Shtohen 10 mijë pensionistë të rinj – 6 mujori/ Më shumë meshkuj, Tirana regjistron numrin më të lartë
Mbi 10 mijë pensionistë të rinj i janë shtuar skemës vetëm në gjysmën e parë të këtioj viti. Sipas të dhënave zyrtare të Institutit të Sigurimeve Shoqërore, konkretisht janë lidhur 10,148 pensione të reja pleqërie. Numrin më të lartë të individëve që kanë mbushur moshën e pensionit e përbëjnë meshkujt me 6,503 pensione të reja, ndërsa gjinia fermërore numëron 3,645. Sa i takon pagesës me të cilën trajtohen, masa masa mesatare mujore e pensioneve të reja regjistrohet në afro 15,194 lekë.
Ajo që vihet re është se meshkujt trajtohen me pensione më të larta se sa femrat, çka tregon dhe diferencat që kanë pasur në paga, pasi masa e pensionit llogaritet në raport me kontributin e dhënë, i cili është i lidhur drejtpërdrejtë me nivelin e pagës së deklaruar.
Kështu pensioni mesatar mujor për burrat është 16,384 lekë, ndërsa për gratë 13,072 lekë. Mosha mesatare e daljes në pension për meshkujt është 65.1 vjec ndërsa për femrat 61.1 vjec. E ndarë sipas qarqeve, numri më i lartë i pensioneve të lidhura rishtazi regjistrohet në Tiranë, e ndjekur nga Fieri dhe më pas listohet Korça dhe Vlora. Më pak pensionistë të rinj, rezultojnë në Kukës.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.