Shtohen 5 inkubatorë në maternitet – Dhuratë nga ‘Credins Bank’, Milo: Në plan edhe iniciativa të tjera

5 inkubatorë të rinj i janë shtuar  Spitalit Universitar Obstetrik-Gjinekologjik “Koço Gliozheni”. Pajisjet e reja janë dhuruar nga Credins Bank, duke iu ardhur në ndihmë fëmijëve të porsalindur që kanë nevojë për terapi intensive.

“Kemi zgjedhur ta ndajmë këtë kontribut me partnerin tonë, kompaninë “Farma Net” duke shpresuar që të kemi kontribuar sadopak në përmirësimin e infrastrukturës shëndetësore të këtij spitali.

Dua të përmend këtu që në mbështetje të përgjegjëshmërisë së politikave sociale në Bankën Credins, fokusi ynë kryesor është objektivi për një mirëqënie dhe shëndet publik të mirë, çka na ka bërë ne që vit pas viti të bëhemi pjesë e iniciativa të rëndësishme të sektorit të shëndetësisë, të organizuara si nga Ministria e Shëndetësisë, ashtu edhe nga institucionet e tjera të shëndetit publik“tha Monika Milo, Zv. Drejtore e Përgjithshme e “Credins Bank”.

Ndërkaq, zv. Ministrja e Shëndetësisë, Mira Rakacolli tha se nisma të tilla plotësojnë investimet e bëra nga qeveria, ndërsa theksoi domosdoshmërinë  e tyre edhe në institucione të tjerë shëndetësorë.

“Falë Bankës Credins këto ofrohen edhe në maternitetin “Koço Gliozheni” disa inkubatorë që do të shërbejnë për kujdes më të mirë ndaj fëmijëve të porsalindur që lindin me probleme të ndonjë patologjie ose probleme të nënpeshës, në mënyrë që dhe ata të gëzojnë jetën e tyre, t’u bashkohen prindërve e familjeve të tyre.

Përgëzoj Bankën Credins për përgjegjësinë sociale që ajo ndjen në përmirësimin e kujdesit shëndetësor dhe social. Duhet të kontribuojmë të gjithë se në fund të fundit është mirëqënie për të gjithë ne, edhe për vetë biznesin” tha Rakacolli.

Shtimi i 5 inkubatorëve në maternitetit “Koço Gliozheni” u përshëndet edhe nga kreu i këtij institucioni. Në kuadër të programit të përgjegjësisë sociale, nëndrejtoresha e Credins Bank bëri me dije se këto iniciativa do të vazhdojnë edhe në të ardhmen.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.