Shtohet hapësira e gjelbër – Veliaj: 2.5 ha të Gardës së Republikës i shtohen Parkut të Liqenit
Pas zgjerimit të pjesës jugore, Parkut të Liqenit do t’i shtohet edhe një hapësirë tjetër e gjelbëruar prej 2.5 hektarësh, nga ana veriperëndimore e tij. Territori që deri më sot ka shërbyer si Garda e Republikës, do t’i kthehet qytetarëve si pjesë e parkut. Në inspektimin e hapësirave të reja që i bashkohen parkut, kreu i Bashkisë së Tiranës, Erion Veliaj tha se ato do t’i kalojnë në administrim Agjencisë së Parqeve dhe Rekreacionit, për ta bërë edhe këtë zonë një pjesë integrale të Parkut të Madh të Liqenit, çka i jep qytetit më shumë gjelbërim dhe oksigjen.
“Garda e Republikës ka dy pjesë: një pjesë i shkon Bashkisë së Tiranës, një pjesë i shkon Ministrisë së Ekonomisë, si pjesë e aseteve, por pjesa e Bashkisë së Tiranës, që ka kryesisht asete të vjetra, ndërtesa të rrënuara, pa ndonjë vlerë historike për qytetin, të amortizuara totalisht, do i kthehet si 2.5 ha Park të Liqenit. Me një vendim qeverie, kryeministri Rama dhe ministrat i falën qytetit një hapësirë që ishte një zonë e pa aksesueshme nga qytetarët, kryesisht për mjete të ushtrisë dhe Gardës, por tani e gjitha do të shkojë në administrim të APR-së ” – tha Veliaj.
Më herët opozita ka akuzuar se në parkun e liqenit do të ndërtohet, duke e kthyer këtë hapësirë të gjelbërt në të betonizuar. Por Kryebashkiaku u përgjigj se këto akuza burojnë nga interesa të ngushta dhe krejtësisht private, e jo nga interesi i qytetarëve, të cilët duan që ky territor t’i shtohet parkut.
Entela Barjamaj /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.