Shtohet pastrimi i parave – Shqipëria humbet pikë në analizën e Institutit të Bazelit
Shqipëria ka shënuar përkeqësim në treguesit e pastrimit të parave. Në raportin për rrezikun e pastrimit të parave të sapo publikuar nga Instituti i Bazelit, Shqipëria renditet në vendin e 85 me 5.75 pikë, duke shënuar përkeqësim në raport me vitin e kaluar, kur vlerësohej me 5.04 pikë. Indeksi mat rrezikun e pastrimit të parave dhe financimeve terroriste në 146 vende.
Ndërkohë, pavarësisht përkeqësimit, kemi përmirësim në renditje, pasi në 2016 ishin në vendin e 102. Por fakti që jemi rritur disa vende nuk është meritë e përmirësimit tonë por e përkeqësimit të vendeve të tjera.
10 vendet me rrezikun më të lartë për pastrim parash e financim të terrorizmit janë; Irani, Afganistani, Guinea, Taxhikistani, Laosi, Mozambiku, Mali, Uganda, Kamboxhia dhe Tanzania. Tre vendet me rrezik më të ulët janë: Finlanda, Lituania dhe Estonia.
Përmirësimet më të mëdha që nga viti 2016 janë bërë nga Sudani, Tajvani, Izraeli dhe Bangladeshi. Vendet që përkeqësohen më së shumti në rezultatet e tyre në 2017 janë Xhamajka, Tunizia, Hungaria, Uzbekistani dhe Peruja.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.