Shtrenjtimi i naftës, kërkohet heqje e akcizës – Qeveria e Kosovës pritet të marrë vendimin për rregullim të çmimit

Qeveria e Kosovës pritet që së shpejti të marrë një vendim të ri lidhur me rritjen e çmimit të naftës në vend. Sipas Ministrisë së Industrisë, Ndërmarrësisë dhe Tregtisë, nëpërmjet këtij vendimi do të rregullohet çmimi i naftës që do të mbrojë konsumatorët dhe konkurrencën sipas ligjit.

“Ligji i ri i naftës parasheh që Qeveria të nxjerrë akt nënligjor për rregullimin e çmimeve të naftës dhe masa të tjera mbrojtëse. MINT ka përgatitur tashmë draftin dhe po zhvillon konsultimet në mënyrë intensive me hisedarë, në mënyrë që sa më parë ta procedojë për miratim në qeveri. Vendimmarrja pritet të ndodhë shpejt”, ka njoftuar ministria.

Nga ana tjetër, sipas Shoqatës së Naftëtarëve të Kosovës, vendimet e OPEC dhe bursa janë përgjegjëse për rritjen e çmimeve. Shoqata është kundër heqjes së akcizës për karburantet, pasi sipas tyre kjo taksë zë rreth 35% të buxhetit të shtetit.

Së fundmi, Aleanca për Ardhmërinë e Kosovës, i ka kërkuar Qeverisë heqjen për një periudhë pesë mujore të akcizës për naftën, heqjen e tatimit mbi produktet bazike të shportës familjare dhe përkrahjen direkte apo indirekte për të ruajtur zinxhirin ekonomik.

Një ditë më parë, çmimi i naftës në Kosovë ka shkuar deri në 1.82 euro, ndërsa është shtrenjtuar edhe çmimi i benzinës duke arritur në 1.84 euro.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.