Shtyhen taksat vendore për bizneset – Tiranë/ Afatet e reja për pagesat që duhet të bëjnë subjektet!
Për shkak të situatës ku ndodhet vendi si pasojë e ndikimeve të luftës Rusi-Ukrainë, rritjes së kostove për bizneset, por edhe të çmimeve, Këshilli Bashkiak i Tiranës ka vendosur të krijojë disa lehtësi përmes shtyrjes së disa taksave vendore.
Konkretisht, Këshilli Bashkiak ka marrë vendimin për shtyrjen e afatit të pagesës për tarifën e pastrimit, taksën e tabelës dhe taksën e përkoshme të infrastrukturës arsimore për datën 20 maj 2022.
Po ashtu, është vendosur shtyrjen e afatit të pagesës të këstit të parë për taksat mbi pasurinë e paluajtshme, përkatësisht, taksa mbi ndërtesën, taksa mbi truallin dhe taksa mbi tokën bujqësore për në datë 20 maj 2022. Ndërkohë është shtyrë edhe afati i pagesës së këstit të dytë për taksat mbi pasurinë e paluajtshme përkatësisht, taksa mbi ndërtesën, taksa mbi truallin dhe taksa mbi tokën bujqësore për në datën 31 korrik 2022.
Drejtoria e Përgjithshme e Taksave dhe Tarifave Vendore u bën apel bizneseve që të respektojnë këto afate, në mënyrë që të shmangin penalitetet. Sipas legjislacionit në fuqi, afatat që duheshin paguar këto taksa dhe tarifa ishte data 20 Prill.
Ky vendim prek vetëm subjektet në kryeqytet, pasi çdo bashki ka të autonomi për të vendosur për krijimin e lehtësirave të tilla sa i përket bizneseve dhe qytetarëve në territorin e tyre.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.