Shtyhet afati i aplikimeve! Dëmshpërblimi i ish të përndjekurve, “shans” i ri për ata që nuk kanë aplikuar si përfitues parësor

Ish të përndjekurit e kategorisë së parë që nuk kanë plotësuar ende dokumentacionin për dëmshpërblim, tashmë do të kenë një mundësi të re për ta bërë këtë. Qeveria ka miratuar projektligjin që u jep një shans të ri atyre që nuk kanë arritur të aplikojnë për dëmshpërblim si kategori e parë deri 1 korrik të vitit 2009. Afati i ri i përcaktuar është 31 dhjetori i vitit 2017. Nëse ata nuk i dorëzojnë dokumentet në këtë afat, atëhere do të humbasin të drejtën e përfitimit prioritar.

Ndryshimi ligjor është miratuar nga qeveria në mbledhjen e fundit e prek ata persona që kanë vuajtur drejtëpërdrejtë pasojat e persekutimit nga regjimi i kaluar e si rrjedhojë bëjnë pjesë në kategoritë e përfituesve parësore.

Ndërkohë, aplikimet për dëmshpërblim të kategorisë prioritare që janë bërë deri me 1 korrik  të vitit 2009 janë të vlefshme. Ndërkohë, pas 31 dhjetorit të këtij viti, ministri i Drejtësisë do të paraqesë para Këshillit të Ministrave dhe Kuvendit raportin me numrin total të kërkesave të paraqitura për dëmshpërblim.

Në kushtet e problematikave me radhët e kompensimit e zvarritjeve të procesit, qeveria ka parashikuar dëmshpërblim prioritar për  ish të dënuarit që janë gjallë kundrejt përfituesve të tjerë që kanë statusin e të përndjekurit.

Kategoria e përfituesve parësore

–  Prioritetin e parë e kanë ish të dënuarat politike femra, që jetojnë në momentin e dhënies së pagesës dhe hyrjes në fuqi të këtij ligji

– Ish të dënuarit politikë që jetojnë në momentin e dhënies së pagesës dhe që kanë moshën mbi 75 vjeç, në momentin e miratimit të këtij ligji

–  Ish të dënuarit politikë të cilët vuajnë sëmundje të rënda

– Ish të dënuarit politikë që jetojnë në momentin e dhënies së pagesës, të cilët pavarësisht moshës kanë pasardhës të radhës së parë, fëmijë, në moshë të mitur në momentin e hyrjes në fuqi të këtij ligji

-Ish të dënuar politikë që nuk jetojnë dhe që kanë trashëgimtarë të radhës së parë, të cilët janë në moshë të mitur në momentin e hyrjes në fuqi të këtij ligji

– Ish të dënuarit politikë që jetojnë në momentin e dhënies së pagesës dhe që kanë moshë edhe nën 75 vjeç, në momentin e miratimit të këtij ligji.

Referuar përllogaritjes së bërë nga ministria e Mirëqënies Sociale, numri i përfituesve të kategorisë parësore arrin në 2 mijë.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.