Shtyhet afati i aplikimeve të studentëve për 803 vendet e lira në administratën publike!

Afati i studentëve të ekselencës për të aplikuar për vendet e punës në administratën publike është shtyrë zyrtarisht. Ky fakt u bë i ditur nga ministrja e Shtetit për Marrëdhëniet me Parlamentin Elisa Spiropali në një komunikim zyrtar për mediat.  Spiropali tha se vetëm gjysma e studentëve kanë arritur të marrin dokumentacionin e nevojshëm për të aplikuar, çka ka krijuar vështirësi për ta në aplikimin për më shumë se 800 vende pune që ofrohen në platformën punëtëmbarë.al.

Po ashtu, në daljen për mediat, ministrja u kërkoi studentëve që të mos shqetësohen për rimbursimin e tarifave universitare të cilat do të paguhen ashtu sikurse edhe bursat. Sipas ministres, vonesat kanë ardhur për shkak të problematikave që shkaktojnë universitetet.

“Jemi të shqetësuar në lidhje me vonesat e shkaktuara për disbursimin e fondit të studentëve. Duke ndjekur shqetësimet e ngritura nga studentët, na rezulton se ka një kakofoni në lidhje me informacionin që marrin studentët në universitet dhe ka një zvarritje të panevojshme nga sekretariatet e fakulteteve” tha Spiropali.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.