Shtyhet gara për Milot-Fier – Ministria: Shkak COVID-19, kompanitë kanë kërkuar më tepër kohë për dokumentet
Ministria e Infrastukturës dhe Energjisë ka shtyrë me një muaj afatin e dorëzimit të ofertave për garën e koncesionit për aksin Milot-Fier. Shkak për këtë vendim është bërë situata e krijuar nga COVID-19, çka sipas dikasterit të transporteve ka ndikuar në mënyrë të drejtpërdrejtë në veprimtarinë e subjekteve tregtare. Sipas ministrisë, kanë qenë kërkesat e vazhdueshme të operatorëve të ndryshëm , drejtuar autoritetit kontraktor për vështirësitë e hasura në përgatitjen si dhe dorëzimin e të gjithë dokumenteve të kërkuara dhe si rrjedhim me kërkesën për më tepër kohë në hartimin dhe plotësimin e tyre.
Për këtë arsye, afati i fundit për dorëzimin e ofertave do të jetë data 28 tetor, nga 28 shtator që u vendos paraprakisht. Gara për këtë aks rrugor përfshin projektimin, ndërtimin, operimin, mirëmbajtjen, rehabilitimin dhe më pas transferimin në pronësi të shtetit. Vlera e investimit parashikohet të arrijë në 1.2 mld euro, ndërkohë që shteti do të garantojë 10% të tij. Financimi parashikohet të kryhet nga kompania private, që do të fitojë garën ndërkohë që kalimi në këtë aks do të jetë me pagesë, ndonëse do të ketë rrugë alternative, pa pagesë. Autostrada Milot-Fier do të ketë një gjatë prej 115 km, ndërkohë që do të përshkruhet për 75 minuta.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.