Shtyhet ligji për emigrantët – Itali, përplasje në koalicion për “jus solis”, do votohet në vjeshtë

Qeveria italiane ka bërë një hap prapa sa i përket ligjit të ri për shtetësinë. Kryeministri Paolo Gentiloni, deklaroi se, ligji do të shtyhet për në vjeshtë pasi ende nuk janë krijuar kushtet për ta miratuar.

Shtyrja vjen për shkak të përplasjeve të forta mes koalicionit qeverisës. Ligji i ri parashikon vendosjen e “Jus solis”, pra të të drejtës së fëmijëve që kanë lindur në territorin italian që të marrin shtetësinë në vend.

Aktualisht, Italia aplikon “jus sanguinis”, ose të drejtën e gjakut, që nuk i jep të drejtë shtetësie atyre që kanë lindur në Itali, por vetëm atyre që kanë të paktën një prej prindërve italianë.

Vendosja e “jus solis” ka qenë një kërkesë e kahershme në vend, të paktën pas viteve `90, jo vetëm si kërkesë e emigrantëve, por edhe si një standard që e ka përqafuar pjesa më e madhe e Europës.

Kalimi i këtij ligji në Senat shihet si një votë besimi për qeverinë, e për këtë arsye është vendosur shtyrja në vjeshtë.

Ligji i ri për fëmijët e emigrantëve parashikon shtetësinë për të gjithë ata që mbërrijnë në territorin italian përpara ditëlindjes së tyre të 12-të e që kanë pasur formalisht një edukim të paktën 5-vjeçar në vend.

Ligji në fjalë ka thuajse 2 vite që është aprovuar nga dhoma e ulët e parlamentit, ndërkohë që kundërshtarët e tij kanë polemizuar 48 mijë amendamente të tij.

Gentiloni shtoi se, ai personalisht dhe qeveria e tij mbeten tërësisht të angazhuar që ta miratojnë ligjin në vjeshtë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.