Shtyhet me dy vjet afati për investimet strategjike – Kërkesa e deputetit në Parlament, shkak “zvarritja” e ligjit prej 4 vitesh

Subjektet investuese të interesuara për të përfituar statusin e investitorit apo investimit strategjik, kanë afat për paraqitjen e kërkesave deri më 31 dhjetor 2021. Duke qenë se së shpejti përfundon kjo mundësi për sipërmarrjet e mëdha, deputeti socialist Arben Pëllumbi ka depozituar në Kuvend një porpozim për zgjatje të këtij afati me 2 vjet, deri në Dhjetor 2023. Por çfarë po ndodh aktualisht me këtë ligj dhe pse arnohet çdo vit?

Prej katër vitesh, që nga 2018-ta, Parlamenti miraton shtyrjen e afatit, me argumentin se po punohet për një ligj të ri për investimet, i cili parashikohej të ishte gati dhe të hynte në fuqi më 1 janar 2020.  Në Tetor të vitit të kaluar, deputetët Milva Ekonomi dhe Ervin Bushati, porpozuan shtyrje të afatit të aplikimeve deri në fund të 2021-shin, me argumentin se Ministria e Financave po punonte per hartimin e nje projektligji te ri “Per investimet” dhe se ky afat do te ishte i mjaftueshem për perfundimin e te gjitha procedurave ligjore te nevojshme per miratimin e ketij akti te ri.

Sipas deputetëve, per shkak te pandemise Covid 19, Ministrise se Financave, i eshte dashur te mobilizoje te gjitha kapacitetet e saj në përballimin  e situatës, duke e bërë të pamundur finalizimin e projektligjit te ri “Per investimet”. Ndërkohë, aktualisht, pas 4 vitesh ende nuk kemi një ligj të mirëfilltë për investimet dhe mesa duket Ministria e Financave ende nuk ka pasur kohën e duhur apo nuk e ka shfytëzuar atë për të hartuar një akt të mirëfilltë ligjor çka bën që të vijohet me të njëjtin legjislacion duke zgjatur afatet vit pas viti.

Nga 2016-ta deri në 2020-ën, vlerësohet se Shqipëria ka përfituar një total prej 343 milionë eurosh në formën e investimeve strategjike

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.