Shtyhet vendosja e tarifave – SHBA zgjeron afatin për Kanadanë, Meksikën dhe BE me 30 ditë
Presidenti i Shteteve të Bashkuara, Donald Trump, ka shtyrë vendosjen e tarifave mbi çelikun dhe aluminin për Kanadanë, Bashkimin Europian dhe Meksikën deri më datë 1 Qershor.
Shtetet e Bashkuara ranë gjithashtu dakord mbi përjashtimin e përhershëm të Argjentinës, Australisë dhe Brazilit.
Vendimi, i publikuar nga Shtëpia e Bardhë, erdhi pak orë përpara skadimit të afatit për këto vende.
Detajet mbi dakordësitë e arritura me Brazilin, Argjentinën dhe Australinë do të përfundohen së shpejti.
“Administrata ka zgjatur gjithashtu negociatat me Kanadanë, Meksikën dhe Bashkimin Europian me 30 ditë. Në të gjithë këto negociata, administrata është përqendruar në kuota që do të kufizojnë importet, parandalojnë transportin e ndërmjetëm të mallrave dhe mbrojë sigurinë kombëtare”, deklaroi Shtëpia e Bardhë.
Trump vendosi më 23 Mars tarifa në 25% për importet e çelikut dhe 10% për aluminin, por dha përjashtim të përkohshëm për Kanadanë, Meksikën, Brazilin, Bashkimin Europian, Australinë dhe Argjentinën.
Trump ka dhënë gjithashtu përjashtim të përhershëm të tarifave mbi çelikun për Korenë e Jugut, pjesë kjo e një rishikimi më të gjerë të paktit tregtar mes dy vendeve.
Tarifat kanë rritur barrierat tregtare me partnerët e SHBA në të gjithë botën dhe ka shkaktuar sfida për Organizatën Botërore të Tregtisë. Këto synojnë rritjen e normës së shfrytëzimit të kapacitetit mbi 80% në 2 industritë në SHBA.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.