Si do të përfitojnë nga fondi 100 milionë dollarë bizneset me xhiro mbi 14 milionë lekë? Detajet pritet të përcaktohen sot
Në fillim të javës kanë nisur aplikimet te Tatimet për atë që është emërtuar “Paga e Luftës”, sipas të cilës bizneset me xhiro vjetore deri në 14 milionë lekë në vit mund të aplikojnë për të përfituar.
Tashmë pritet që të nisë edhe një proces tjetër, ai i mbështetjes financiare për kompanitë me xhiro vjetore mbi 14 milionë lekë në vit.
Në paketën financiare për përballimin e pasojave të shkaktuara nga masat për parandalimin e përhapjes së COVID-19 në Shqipëri është parashikuar një fond në vlerë 100 milionë dollarë si garanci sovrane për ata që kanë vështirësi objektive për pagat e punonjësve.
Për këtë qëllim, pritet që ditën e sotme të zhvillohet një bashkëbisedim mes përfaqësuesve të qeverisë dhe atyre të sistemit bankar për të përcaktuar modalitetet.
Skema është ajo e dhënies së kredive me interesa të ulëta për bizneset me xhiro mbi 14 milionë lekë në mënyrë që të paguajnë pagat e punonjësve nëse kanë vështirësi dhe qeveria në këtë rast luan rolin e garantit.
Pas bisedimeve të sotme, pritet që të përcaktohen edhe detajet për mënyrën sesi bizneset mund të aplikojnë, interesat e kredive etj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.