Si do të rigjenerohet punësimi? – Vitin e ardhshëm “zbret” papunësia, efektet nga paga minimale
Ndonëse ky vit dha goditjen më të madhe në punësim, duke lënë mbi 55 mijë qytetarë të papunë, parashikimet për vitin e ardhshëm nga ana e qeverisë janë optimiste. Në projektbuxhetin 2021, programohet që norma e papunësisë të ulet në nivelin 12.2% krahasuar me të pritshmen e vitit 2020 prej 13.9%. Ky parashikim mbështetet në nivelin e lartë të investimeve publike prej 7.2% e PBB të planifikuara gjatë vitit që vjen.
Po ashtu, në draft mendohet që të ardhurat nga “Kontributet për Sigurime Shoqërore e Shëndetësore” në vitin 2021 të rriten me +5.9%, ose +5.4 miliardë lekë krahasuar me të pritshmin e vitit 2020, si rrjedhojë e rritjes së punësimit që do të vijë nga rritja ekonomike, forcimi i administrimit nëpërmjet kontrollit të nivelit të pagës të deklaruar dhe deviacionit të saj nga paga reale që përfitohet si dhe rritje së pagës minimale nga 26 mijë në 30 mijë lekë me efekt vjetor të të ardhura rreth 3 miliard lekë.
Integrimi në tregun e punës gjatë vitit të ardhshëm do të mbështetet edhe nga skemat e nxitjes së punësimit, që synojnë të mbështesin ata që dolën nga tregu gjatë pandemisë, mbështetjes ndaj biznesit përmes lehtësive fiskale të tatim-fitimit dhe TVSH-së, duke nxitur kështu vetëpunësimin. Në buxhet, parashikohen që të ardhurat nga “Tatimi mbi të Ardhurat Personale” të rriten me 12.9% më shumë se pritshmëritë për vitin 2020, ku është marrë për bazë rritja e nivelit të pagës mesatare si dhe rritja e numrit të të punësuarve në sektorin privat.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.