Si do të strehojnë bashkitë? Denaj: Këtë vit ka kushte për marrjen e fondeve
Edhe pse për vitin 2019 buxheti për strehim të popullsisë është rritur me 30 për qind, bashkitë duhet të plotësojnë një kusht kryesor që të mund ta përthithin atë. Ndërsa kërkohet edhe përgjegjshmëri maksimale në përdorimin e fondeve.
“Vitin e kaluar u miratua ligji i ri “Për strehimin social”, i cili parashikon disa programe që adresojnë shtresa të ndryshme të shoqërisë dhe situata të ndryshme strehimi. Ndërkohë, këto politika janë shoqëruar dhe me buxhete. Në vitin 2019, buxheti për strehimin pësoi një rritje prej 30% krahasuar me një vit më parë.
Por çka kërkohet në vijim është rritja e përgjegjshmërisë së njësive, akordimi i fondeve nga niveli qendror dhe kryesisht ai vendor. Për këtë arsye, këtë vit është vendosur se një nga kushtet për të përfituar fonde buxhetore është kontributi i jo më pak se 20 % të kostove të projekteve të mbulohet nga të ardhurat e vetë bashkive.
Po jap disa shifra se ku qëndrojmë sot:
Janë ndërtuar gjithsej 1,138 apartamente sociale me qira, të cilat janë në pronësi të 8 bashkive, me fondet e veta të ndërtuara dhe nga viti 2011 janë 570 apartamente në programin e banesave me kosto të ulët; Janë dhënë rreth 4,000 kredi me interesa të subvencionuara nga buxheti i shtetit. Politikat e strehimit pas vitit 2013 kanë një fokus më të përqendruar në zgjidhjen e problematikave në familjet e varfra dhe të pa favorizuara, si familje të minoritetit rom e egjiptian, gra të dhunuara, familje një prindërore, persona me aftësi të kufizuara, etj.. Gjatë viteve 2014-2018 janë ndihmuar rreth 1,700 familje për të paguar qiranë e banesës në treg dhe rreth 1,200 familje me investime për përmirësimin e kushteve të banimit” tha Denaj.
Duke folur për çështjet e strehimit, kryetari i Bashkisë së Tiranës, Erion Veliaj, në përgjigje të të gjithë akuzave për betonizimin e Tiranës, theksoi se Bashkia do të vijojë të japë leje ndërtimi në përputhje me planin urbanistik, pasi çdo vit, 25 mijë qytetarë kanë nevojë të strehohen.
“Për sa kohë që Tirana ka një plan urbanistik dhe për sa kohë Tirana është një qytet që vazhdon të rritet atëhere do të vazhdojë të ketë leje ndërtimi.
Nuk kishte për dy vite për sa kohë nuk kishim një plan urbanistik por për sa kohë që gjërat janë përcaktuar qartë, me një pyll orbital me kufi ku ne nuk do të kontaminojmë më zonë të gjelbër dhe do të vazhdojmë të rritemi me cilësi në zona tashmë të urbanizuara , askush nuk duhet të habitet.
Fakti që Tirana është një nga qytetet ku 4 vitet e fundit çmimet e banesave kanë ndenjur stabël do të thotë që si kudo tjetër edhe këtu funksionon kapitalizmi. Nuk i cakton shteti me planifikim por kërkesë-oferta” tha Veliaj.
Aktiviteti me temë “Arritja e objektivave të Zhvillimit të Qendrueshëm në Shqipëri”, trajtoi problematikat kryesore që lidhen më strehimin në vendin tonë, me synim që deri në 2030-ën të jenë adresuar.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.