Si do t’i mbështesë Bullgaria kompanitë nga çmimet e larta të energjisë?!

Qeveria e Bullgarisë ka miratuar një masë të re që do të mbështesë kompanitë mes rritjes së çmimeve të energjisë. Kryeministri Kiril Petkov njoftoi këtë fillim jave se vendi do të kompensojë pjesërisht bizneset për kostot e larta të energjisë elektrike në mes të luftës në Ukrainë.

Sipas planit, qeveria do të mbulojë 80% të çmimeve të energjisë elektrike që janë mbi 200 leva (102 euro) për megavat-orë në maj dhe qershor. Sofja do të kompensojë gjithashtu plotësisht rritjen prej 14% në çmimet e gazit natyror pasi Rusia shkurtoi furnizimet për vendin muajin e kaluar.

Njoftimi erdhi pas një takimi midis Petkov dhe përfaqësuesve të organizatave të punëdhënësve dhe sindikatave. Në një deklaratë, Petkov tha se vendi i Bashkimit Europian po përgatit gjithashtu “një mekanizëm mbështetës afatgjatë nëse është e nevojshme” krahas masave të reja.

“Kjo do të sigurojë parashikueshmëri për bizneset në rast se paqëndrueshmëria e tregut vazhdon,” tha ai. Bullgaria kishte ngrirë tashmë çmimet e rregulluara të energjisë elektrike për familjet dhe ka kompensuar kompanitë për kostot e larta të energjisë që nga tetori.

Vendi anëtar i BE-së ishte mbështetur në 90% të gazit të tij nga Rusia përpara se Gazprom të shkurtonte eksportet për shkak të refuzimit të Bullgarisë për të paguar në rubla.

Sofja që atëherë ka siguruar urgjentisht furnizime alternative me gaz nga Greqia dhe po punon për një marrëveshje të re me Azerbajxhanin. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.