Si e ndikoi COVID “jetën” e bizneseve? – Të ardhurat nga tatimi mbi fitimin, më të ulëtat në 5 vite
Pandemia COVID-19 ka ndikuar ndjeshëm jetën e bizneseve në vendin tonë, fillimsht gjatë ndërprerjes së aktivitetit të tyre thuajse dy mujor për shkak të mbylljes si rrjedhojë e masave të marra nga qeveria dhe më tej për shkak të rënies së konsumit, që është reflektuar direkt në xhiro dhe fitim. Por si paraqiten të ardhurat që mbledh Drejtoria e Përgjithshme e Tatimeve nga tatimi mbi fitimin e bizneseve?
Sipas të dhënave zyrtare të financave, gjatë periudhës Janar-Tetor 2020, nga tatimi mbi fitimin, janë arkëtuar në buxhet 22.3 miliardë lekë, apo 178 milionë euro, shifër kjo në rënie të ndjeshme krahasuar më të njëjtën periudhë të një viti më parë, me afro 7.4 miliardë lekë dhe rreth 25.1 për qind më pak. Por po të analizojmë shifrat ndër vite, vihet re se ky 10-mujor ka performancën më të dobët në 5 vitet e fundit.
Të ardhurat më të ulëta janë regjistruar në 2015-ën me 19.7 miliardë lekë , të cilat më tej kanë ardhur në rritje të vazhdueshme, për të kulmuar në vitin 2019 me 20.7 miliardë lekë, i cili rezulton edhe si viti më i mirë në këtë drejtim. Ndërsa 2020-ta me goditjen që dha COVID-19 dhe tërmeti i 26 nëntorit, pësoi rënie të perfomancës.
Kjo ka ardhur për shkak të mbylljes së një sërë subjekteve gjatë kësaj periudhe, të cilat nuk arritën ti rezistonin rënies së kërkesës, rënies së aftësisë paguese si dhe shtyrjes së pagesës së kësteve të tatim-fitimit nga ana e qeverisë, për disa kategori, për vitin e ardhshëm, me qëllim lehtësimin e barrës së tyre.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.