Si të bëheni një menaxher i suksesshëm?
Delegimi mund të jetë pika kyçe e shumë menaxherëve dhe njëkohësisht pika më e dobët e shumë menaxherëve të tjerë. Shpeshherë, menaxherë të kompanive të ndryshme mendojnë se mund t’i bëjnë vetë shumë punë të cilat do të ishte mirë t’ia delegonin dikujt tjetër. Më poshtë do të gjeni 3 mënyra për tu bërë menaxher i suksesshëm.
- Zbatojeni punën tuaj me përpikmëri
Edhe pse mund të duket një gjë shumë normale, është shumë e rëndësishme që të kuptoni se punën tuaj duhet ta kryeni me ndershmëri e përpikmëri. Ju nuk mund t’u kërkoni të tjerëve të bëjnë këtë apo atë, nëse ju vetë nuk bëni asgjë. Menaxheri i një kompanie në procesin e punës, duhet të kryejë një gamë të gjerë funksionesh dhe të zotërojë një sërë cilësish për të realizuar me sukses rolet e tij e për tu dhënë shembull punonjësve.
- Përpiquni të njihni punonjësit tuaj, si dhe kapacitetin e tyre
Një menaxher i suksesshëm duhet të njohë patjetër punonjësit e tij si dhe kapacitetin e tyre, në mënyrë që të dijë kujt ti delegojë çfarë. Delegimi i punëve ne një kompani është rregull parësor, kështu që nëse i njihni punonjësit tuaj dhe delegimi i punëve do të shkojë në mënyrë të përsosur. Nëse nuk njihni kapacitetin e secilit prej punonjësve tuaj, nuk do të dini se kujt ti delegoni çfarë e gjithçka do të kthehet në një katrahurë.
- Mos ndërhyni në punën e punonjësve tuaj nëse nuk është e nevojshme
Janë pikërisht menaxherët ata të cilët bashkojnë e koordinojnë procesin e punës, arritjen e objektivave të organizatës si dhe mbarëvajtjen e punëve që kanë deleguar. Por ndonjëherë duke u përpjekur të mbajnë gjithçka nën kontroll ndodh që të bëhen posesivë e të ndërhyjnë në punën që u kanë ngarkuar punonjësve pa qenë nevoja. Kjo nuk duhet të ndodhë, sepse jo vetëm që pengon punën e punonjësve por tregon se nuk keni besim se ata mund ta bëjnë punën siç duhet.
Viola Hydi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.