Si të mos e ktheni në një vend të urryeshëm qytetin ku jetoni?!
Nëse nuk jeni të kënaqur me vendin tuaj, është e rëndësishme të bëni një ndryshim. Dhe nëse financat ose detyrimet familjare ju ndalojnë të filloni gjithçka nga fillimi diku tjetër, provoni të bëni një përpjekje të vetëdijshme për t’u dashuruar me qytetin tuaj.
Ja cilat janë tre nga ndryshimet që mund të bëni për të arritur këtë:
– E para është gjetja e një grupi konstant të afërmish e miqsh. Sipas studimit të Soul of the Community Knight Foundation, një nga tre faktorët kryesorë që kontribuojnë në lidhjen me lokalitetin ku banoni është besimi se qyteti juaj është plot me mundësi sociale. Ju duhet të keni përshtypjen se keni diçka për të bërë një të Shtunë mbrëma si dhe një ose dy miq që mund t’iu shoqërojnë. Edhe nëse jeni tip jo i shoqërueshëm anëtarësimi në kurse të ndryshme arti ose sporti mund t’iu lehtësojnë krijimin e marrëdhënieve shoqërore të shpejta. Sigurisht nëse keni fëmijë apo qen është gjithnjë më e lehtë për të thyer akullin me individë të tjerë që janë në një situatë të ngjashme me ju.
– E dyta është vlerësimi i natyrës. Sipas studimit të Soul of the Community, të admirosh estetikën e vendit ku jeton, të bën shumë më të predispozuar të ndjehesh i lidhur me të. Dhe hulumtimi ka treguar që koha e kaluar në mes pemësh dhe parqesh ka përfitime të tilla të dukshme shëndetësore, sa që disa shkencëtarë e quajnë atë vitaminë G. Koha e shpenzuar në ecje apo shëtitje në vendin ku jetoni ju lidh më shumë me ambientin përreth duke ju shtuar në këtë mënyrë edhe kujtime të shumta të lidhura me qytetin vetëm ose me njerëz të tjerë.
– E treta është të blesh më shumë produkte lokale. Kur e doni qytetin tuaj, ju bëni atë që është e mirë për të dhe blerja nëpër dyqane të pavarura të zonës është një nga mënyrat për ta bërë këtë. Kështu jo vetëm ndihmoni në qarkullimin e parasë e rritjen ekonomike të vendit por krijoni edhe miqësi dhe marrëdhënie shumë të këndshme me pronarët apo shitësit e këtyre bizneseve apo dyqaneve familjare. Kur pronari i librarisë lë mënjanë një libër për fëmijë duke menduar se fëmija juaj do ta pëlqejë, ose kamerieri i lokalit ku shkoni zakonisht nis të përgatisë pijen tuaj që në momentin që ju futeni brenda, ju filloni të mendoni se komuniteti ka gdhendur një vend për ju. Ju luani një rol në punën e tij të përditshme. Kjo ndjenjë e përkatësisë e bën shumë më të lehtë të dashurosh vendin ku jetoni.
Është e vërtetë që ju mund të bëni gjithë këtë punë të vështirë për të vendosur më në fund se realisht qyteti juaj nuk është vendi për ju. Por është gjithashtu e mundur që ju të ndryshoni mendimin tuaj plotësisht. Ndonjëherë nuk keni nevojë të bëni shumë veçse ta njihni pak më mirë vendin ku jetoni. (Quartz)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.