Si të punësohemi menjëherë?!- Ja si t’i përgjigjemi saktë pyetjeve në intervistat e punës
Që të kemi një intervistë pune sa më suksesshme fillimisht duhet të jemi të qetë dhe të lëmë mënjanë pasiguritë. Më poshtë ju sjellim disa këshilla sesi mund t’i përgjigjeni disa nga pyetjeve më të zakonshme në intervista. Një nga pyetjet më të shpeshta, është ajo që lidhet me reagimin tonë kundrejt kritikave që mund të na bëhen në punë. Si një nga pyetjet më të zakonshme në një intervistë për punë, shpjegoni se e shihni kritikën si një mënyrë për të përmirësuar veten dhe metodologjinë tuaj të punës. Edhe nëse nuk i trajtoni shumë mirë kritikat, tregoni se nuk e merrni kurrë personalisht dhe përpiqeni të jepni shembuj nga situatat e kaluara ku i keni trajtuar mirë kritikat.
Më tregoni për punën tuaj të mëparshme?- Edhe nëse e urreni punën tuaj të mëparshme, ajo që ju duhet të thoni është se ishte shumë e dobishme në përmirësimin e aftësive tuaja.
A keni ndonjë pyetje?- Nëse ju drejtohet një pyetje e tillë, pyesni gjithmonë për diçka rreth kompanisë dhe tregoni se keni bërë hulumtimin tuaj. Eshtë shumë e rëndësishme të keni informacione paraprake rreth kompanisë ku synoni të punësoheni. Studioni vendin tuaj të ardhshëm të punës, raportet e llogarisë, numrin e punonjësve, data e themelimit, etj. Duke treguar se dini diçka rreth kompanisë tregon interesin tuaj.
Pse mendoni se jeni personi i duhur për këtë punë?- Disa njerëz shqetësohen me pyetje si këto, por përgjigja është shumë e thjeshtë. Tregoni ngjashmëritë midis kërkesave të kompanisë për pozitën dhe aftësitë tuaja. Nëse nuk keni aftësi, atëherë është më mirë të aplikoni për një punë tjetër ose të përpiqeni të përmirësoni aftësitë tuaja.
Ku e shihni veten pas 5 vitesh?- Po,kjo është një ndër pyetjet më të shpeshta. Edhe në qoftë se ju nuk keni ide se çfarë do të hani nesër për darkë, në intervistë gjithmonë mbani mend t’i përgjigjeni kësaj pyetjeje në një mënyrë të thjeshtë dhe objektive. Imagjinoni të keni një vizion bazë të së ardhmes suaj: të keni një shtëpi të re, të jeni të qëndrueshëm në jetë, të merrni një promovim në kompani etj.
Çfarë ju motivon në punë ?- Një përgjigje e mirë do të ishte: disiplina, integrimi dhe mjedisi i punës. Një përgjigje e tmerrshme do të ishte: paga.
Çka është më e rëndësishme: paga apo puna?- Mos hezitoni të përgjigjeni sinqerisht kësaj pyetjeje. Askush nuk dëshiron të punojë falas. Shpjegoni se të dyja janë të rëndësishme dhe duhet të plotësojnë njëra-tjetrën në mënyrë të drejtë.
Pse ishit të papunë për një kohë kaq të gjatë?- Nëse ju keni qenë në të vërtetë të papunë për një kohë të gjatë, atëherë tregojini atyre se si ajo kohë ishte produktive. Thoni se keni fituar më shumë njohuri dhe keni ndjekur kurse, seminare etj. Asnjëherë mos tregoni që thjesht nuk keni bërë asgjë dhe e keni kaluar gjithë këtë kohë në shtëpi.
Më trego për veten.- Nuk ka përgjigje të saktë apo jo për këtë pyetje, por është e këshillueshme që të përgjigjeni objektivisht dhe të jepni shembuj të gjërave që lidhen me përvojat profesionale. Mundohuni të mos flisni shumë për jetën tuaj.
Mos u vononi- Edhe nëse e njihni vendin dhe e dini se si të arrini atje, shmangni vonesat dhe përpiquni të lini një orë më herët se normalisht. Një vonesë menjëherë jep një përshtypje negative.
Mediat sociale- Kujto botën në të cilën jetojmë sot dhe sa e lehtë është qasja në të dhënat tuaja personale. Intervistuesi sigurisht që ka parë profilin tuaj në Facebook dhe tashmë di më shumë për ju sesa mendoni. Për këtë arsye, përpiquni të mos vendosni ndonjë gjë në mediat sociale që mund t’ju bëjnë kompromis.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.