Siguria e furnizimit me gaz – Miratohen ndryshimet në ligj/ Plan veprimi në raste krizash, furnizim konstant për përdoruesit
Komisioni parlamentar i Veprimtarive Prodhuese ka miratuar ndryshimet në ligjin “Për gazin natyror”, duke parashikuar përditësimin dhe krijimin e elementëve të rinj që kanë të bëjnë me sigurinë e furnizimit me gaz natyror. Ndër të tjera, ndryshimet e propozuara parashikojnë planin e veprimit parandalues dhe një plan emergjence, i cili konsiston në masat e nevojshme për të garantuar sigurinë e furnizimit me gaz.
Gjithashtu, ndryshimet ligjore parashikojnë dhe bashkëpunimin me shtete e anëtare të Komunitetit të Energjisë në përballimin e situatave emergjente, duke rritur sigurinë e furnizimit me gaz.
Për ndryshimet ligjore nuk ka ende një përllogaritje të efekteve financiare që do të prodhojë. Ndërkohë që, sipas relacionit që shoqëron ndryshimet ligjore “duke konstatuar edhe faktin që shteti shqiptar nuk zotëron një rrjet të mirëfilltë të furnizimit, transmetimit, shpërndarjes dhe depozitimit të gazit natyror, vlerësohet se ndryshimet në fazën aktuale, por edhe në një të ardhme afat-mesme nuk do të prodhojnë efekte financiare për buxhetin e shtetit”.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.