Siguria ushqimore: Bujqësia dhe ndryshimet klimatike!

Elbi, misri, manioca (kasava), vaji i palmës, kanola, orizi, melekuqe, soja, kallam sheqeri, gruri: këto janë dhjetë kulturat kryesore në botë dhe sigurojnë 83% të kalorive të konsumuara në ushqim. Studime të ndryshme kanë parashikuar se, në të ardhmen, do të shohim një ulje të madhe të rendimenteve nëse ndryshimi i vazhdueshëm klimatik vazhdon me intensitetin aktual.

Tani, hulumtimet e reja tregojnë se ndryshimi i klimës tashmë ka ndikuar negativisht në prodhimin e këtyre burimeve jetike dhe se në disa rajone të botës ulja është më e theksuar se në të tjerat. Studimi, i publikuar në PLOS ONE, i kryer nga një ekip studiuesish nga universitetet e Minesotës, Oksfordit dhe Kopenhagës, krahasoi të dhënat meteorologjike dhe të dhënat e të korrave bujqësore nga vitet e fundit për të vlerësuar ndikimin e klimës në bujqësi.

Me pak fjalë:

• ndryshimi klimatik shkakton (në mbarë botën) një ndryshim të rëndësishëm në rendimentin e kulturave kryesore; reduktimi i përgjithshëm mesatar është 1%, por zbret nga -13.4% për vajin e palmës në + 3.5% për sojën;
• ndikimet e ndryshimeve klimatike në prodhimin e ushqimit bujqësor janë kryesisht negative për Europën, Afrikën Jugore dhe Australinë, ndërsa ato janë paksa pozitive për Amerikën e Jugut; më e pasigurt (mes pozitive dhe negative) për Azinë, Amerikën Qendrore dhe Veriore;
• gjysma e të gjitha vendeve që nuk janë të vetë-mjaftueshme në prodhimin e ushqimit bujqësor vuajnë nga një reduktim i prodhimit, dhe kjo është gjithashtu e vërtetë për disa vende të industrializuara në Europën Perëndimore.

Rezultatet e studimit janë në shqyrtim nga agjencitë e Kombeve të Bashkuara që merren me synimet për zhvillim të qëndrueshëm. “Puna na tregon një situatë shumë komplekse”, komenton Snigdhansu Chatterjee (Instituti i Statistikave të Universitetit të Minesotës): “Një modelim i përpunuar statistikor dhe një vlerësim jashtëzakonisht rigoroz i të dhënave janë të nevojshme, gjithashtu për të dhënë indikacionet e duhura për të zhvilluar politika të arsyeshme bujqësore, për të shmangur që të ketë vende që e gjejnë veten krejtësisht të varur nga të tjerët për nevojat e tyre ushqimore, një skenar i mundshëm që duhet të përpiqemi ta shmangim”. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.