Sigurimet, ende nën efektin e Pandemisë: Janar-prill, ranë 18.7% kontratat e kartonit jeshil, u rrit me 80% sigurimi kufitar
Pandemia Covid 19 vijon të ndikojë fort treguesit e sektorit të sigurimit pavarësisht rënies së infektimeve. Gjatë periudhës janar prill kanë shënuar rënie të dukshme kontratat e kartonit jeshil, ndërkohë që thuajse janë dyfishuar ato të sigurimit kufitar. Sipas të dhënave zyrtare të publikuara nga Autoriteti i Mbikëqyrjes Financiare, Produkti Karton Jeshil në periudhën janar-prill pati një ulje prej 8.36% të volumit të primeve të shkruara bruto. Kjo u shoqërua nga një ulje të numrit të kontratave prej 18.76% krahasuar me periudhën janar-prill 2020.
Ndërkaq, produkti Sigurim Kufitar, në periudhën janar-prill, pati një rritje 80.03% të volumit të primeve të shkruara bruto krahasuar me periudhën janar-prill 2020. Edhe numri i kontratave u rrit me 79.31%. Ekspertët e lidhin rënien e kontratave të kartonit jeshil me masat e forta shtrënguese që aplikuan shtetet gjatë muajve të parë të vitit, ndërkohë që rritja e kontratave të sigurimit kufitar vjen si pasojë e shtimit të numrit të të huajve që hynë në Shqipëri me lehtësimin e masave.
Nga ana tjetër, pagesat e dëmeve gjatë periudhës janar-prill 2021 u ulën me 13.40% krahasuar me periudhën janar-prill 2020. Pjesa më e madhe e dëmeve të paguara bruto i përket sigurimit motorik me rreth 1,382 milionë lekë, apo 54.35% të totalit të dëmeve të paguara bruto.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.