Sigurimet, “zhytur” në mediokritet – Rritje e dobët dhe dominim i produkteve të detyrueshme
Tregu i sigurimeve edhe këtë vit po shfaqet në stanjacion dhe i mbështetur në masën dërrmuese te produktet e detyrueshme. Sipas të dhënave nga Autoriteti i Mbikëqyrjes Financiare (AMF), rritja u ngadalësua më tej në muajin gusht dhe për tetë mujorin primet u rritën me vetëm 2.3% krahasuar me një vit më parë.
Rritja ka qenë më e lartë në tregun e sigurimit të jetës, me rreth 10%, ndërsa për segmentin e jo-jetës primet janë rritur me vetëm 1.8% krahasuar me të njëjtën periudhë të vitit të kaluar. Për më tepër, tregu është gjerësisht i dominuar nga sigurimet e detyrueshme.
Shifrat e AMF-së tregojnë se primet nga sigurimet e detyrueshme motorike për përgjegjësitë ndaj palëve të treta përbëjnë mbi 68% të totalit. Nëse këtu do të shtonim edhe produktet që nuk janë ligjërisht të detyrueshme, por praktikisht të tilla, si për shembull sigurimi i jetës së debitorëve apo sigurimi nga aksidentet në udhëtim, mund të themi se rëndësia e produkteve të mirëfillta vullnetare në tregun shqiptar të sigurimeve është e papërfillshme.
As ngjarjet e rënda, si fatkeqësitë e herëpashershme natyrore, nuk duket se e ngacmojnë shumë ndërgjegjësimin e shqiptarëve për t’u siguruar. Primet e sigurimit nga forcat e natyrës për tetë mujorin e këtij viti ishin gjithsej vetëm 823 milionë lekë, në rënie me 30% krahasuar me vitin e kaluar. Mesatarisht, deri tani këtë vit çdo shqiptar ka shpenzuar rreth 2.3 euro për të siguruar pronën nga zjarri dhe forcat e natyrës.
Kompanitë e sigurimeve nuk shqetësohen shumë as për të promovuar këto produkte dhe as për të sensibilizuar publikun. Siguruesit janë të kënaqur duke ndarë tortën e sigurimeve të detyrueshme që iu ka siguruar ligji dhe klientët që iu sjellin bankat; për pjesën tjetër, përpiqen kryesisht të fitojnë ndonjë tender të rëndësishëm nga sektori publik ose të sigurojnë kontrata me klientë të mëdhenj biznes.
Misionin e vështirë për të edukuar shoqërinë për rëndësinë e sigurimit asnjë nuk ka dëshirë ta marrë seriozisht.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.