Sigurimi i jetës – Rritet me 27%, dominon sigurimi i jetës për kreditë
Tregu i sigurimit të jetës është në rritje gjatë fillimit të këtij viti. Sipas të dhënave nga Autoriteti i Mbikëqyrjes Financiare, primet bruto të sigurimit të jetës për katër muajt e parë të vitit 2017 janë zgjeruar me 27% krahasuar me një vit më parë.
Gjithsej, kompanitë e sigurimit të jetës arkëtuan rreth 345 milionë lekë prime.
Rritja me ritme më të larta se mesatarja e tregut ka bërë që pesha specifike e jetës në industrinë e sigurimeve të rritet lehtë në 7.3%, nga 6.5% që ishte në të njëjtën periudhë të një viti më parë. Sidoqoftë, pjesa e tregut të jetës në sigurime ngelet mjaft e ulët krahasuar me tregjet e zhvilluara.
Sigurimet e jetës në Shqipëri vazhdojnë të dominohen nga produktet praktikisht të detyrueshme, sidomos nga jeta e debitorit. Kjo klasë sigurimesh u rrit me 46% gjatë katërmujorit të parë, për një total primesh prej 231 milionë lekësh.
Aktualisht, jeta e debitorit përbën rreth 67% të volumit total të primeve në sigurime.
Ky produkt është i lidhur me kredinë bankare. Siç dihet, për kreditë në vlera të mëdha, bankat kërkojnë si garanci, mes të tjerash, edhe sigurimin e jetës së huamarrësit.
Primi i sigurimit llogaritet në varësi të shumës së kredisë që sigurohet.
Ashtu si edhe në tregun e jo-jetës, produktet e mirëfillta vullnetare janë pak të zhvilluara, çka tregon një kulturë sigurimesh ende mjaft të dobët në shoqëri.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.