Sigurimi i mjeteve – Siguruesit, kundërshti me projektligjin e AMF

Projektligji i ri për sigurimin e detyrueshëm në sektorin e transportit, i propozuar nga Autoriteti i Mbikëqyrjes Financiare, ka hasur në kundërshti nga kompanitë e sigurimeve. Në një intervistë për Tv Scan, sekretari i përgjithshëm i Shoqatës së Siguruesve Shqiptarë, Edvin Libohova, thotë se për disa pika të projektligjit nuk është gjetur dakordësia me AMF. Për këtë arsye, Shoqata e Siguruesve i ka dërguar Ministrisë së Financave disa propozime alternative.

Ndonëse në tërësi kompanitë e sigurimeve vlerësojnë frymën dhe risitë e projektligjit të ri, duke nisur nga zbatimi i sistemit bonus-malus, ata kundërshtojnë disa kufizime të vendosura në ligj lidhur me shpenzimet dhe komisionet. Sipas tyre, vendosja në ligj e kufijve të shpenzimeve cenon konkurrencën dhe lirinë e tregut. Gjithashtu, siguruesit kundërshtojnë dispozitën që ju ndalon të ndryshojnë nivelin e primeve më shumë se dy herë në vit. Zoti Libohova thotë se ky përcaktim bie ndesh me parimin e liberalizimit të primeve dhe të kufizon të drejtën e kompanive për t’i vendosur apo ndryshuar ato.

Një problem tjetër për kompanitë e sigurimeve është rritja e kufijve të dëmit.  Kufiri minimal i përgjegjësisë për mjetet e transportit publik arrin në mbi dy milionë euro për ngjarje sigurimi. Për shembull, në rast se një autobus aksidentohet për faj të drejtuesit, kompania e sigurimeve mund të paguajë në total deri në 270 milionë lekë.

Për çdo pasagjer që humbet jetën, vlera minimale e dëmshpërblimit do të jetë 2 milionë lekë, ndërsa nëse aksidenti shkakton paaftësi të përhershme për punë, i dëmtuari përfiton 4 milionë lekë dëmshpërblim. Zoti Libohova thotë se një rritje e tillë mund të përballohet vetëm duke rritur primet, çka do t’i vinte kompanitë në vështirësi, për shkak të fuqisë së dobët blerëse dhe zhvillimit të ulët të tregut.

Një pikë tjetër ku kompanitë nuk janë dakord me propozimet e AMF-së është kontrolli i organeve drejtuese të Entit të Fondit të kompensimit. Sipas Shoqatës së Siguruesve, shumica e anëtarëve të Bordit të Entit duhet të propozohen nga kompanitë dhe jo nga vetë AMF. Megjithatë, z.Libohova thotë se për këtë çështje po shkohet drejt arritjes së një kompromisi me AMF.

Ligji i ri pritet të mundësojë aplikimin e sistemit bonus-malus, sipas të cilit primet e sigurimit të detyrueshëm të mjeteve do të paguhen në bazë të historikut të dëmeve. Projektligji gjithashtu parashikon se primet  e sigurimit të detyrueshëm motorik duhet të miratohen nga AMF dhe nuk mund të ndryshojnë më shpesh se dy herë në vit.

Një rekomandim i Autoritetit të Konkurrencës për rregullimin e tregut, dëmshpërblimi i drejtpërdrejtë i të dëmtuarve nga siguruesi i tyre, përfundimisht nuk është pranuar nga AMF. Autoriteti i Konkurrencës argumentonte se një hap i tillë do të rregullonte tregun, sepse kompanitë do të hynin direkt në marrëdhënie me klientët e tyre dhe do të ishin më të interesuar të shërbenin më mirë në rast dëmesh.

Ndërkohë, klienti do të ishte më i prirur të zgjidhte kompaninë në bazë të shërbimit dhe jo thjesht duke ndjekur çmimin më të ulët, siç ndodh aktualisht. Projektligji i hartuar nga AMF parashikon që shoqëritë e sigurimit mund të lidhin marrëveshje mes tyre për këtë qëllim, por kjo praktikë nuk do të jetë detyruese.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.