Sigurimi i përgjegjësisë profesionale – Një i dëmtuar nga mjekët specializantë përfiton 5 mln lekë

Mbulimi i Përgjegjësisë Profesionale dhe Personale të studentit specializant për një vit do të kushtojë 14 milionë lekë pa TVSH. Sigurimi profesional ka si qëllim që të mbulojë dëmtimet që i shkakton palëve të treta gjatë periudhës së specializimit dhe ushtrimit të detyrave të parashikuara në programin specializues të organizuar nga Universiteti i Mjekësisë.

Kjo policë shërben për dëmshpërblimin e të siguruarit në lidhje me përgjegjësinë e tij ligjore profesionale kundrejt palëve të treta, për çdo kërkesë të palëve të treta.

Kufiri maksimal për dëme të kombinuara (për dëmtimet trupore, dëmtime pasurore dhe dëmtimeve personale) do të jetë 5 milionë lekë për çdo student specializant. Blerje e Shërbimit të Siguracionit për Specializantët e Universitetit të Mjekësisë është për 12 muaj dhe e ndarë me dy lote.

Loti i parë është për “Sigurimi i jetës dhe i shëndetit të studentit specializant gjatë ushtrimit të detyrës”. Dhe loti i dytë është për “Sigurimi i përgjegjësisë profesionale dhe personale të studentit specializant”.

Vlerat financiare që do të përdoren respektivisht janë tetë milionë për lotin e parë dhe mbi gjashtë milionë për lotin e dytë. Ndërsa fondi limit për sigurimin profesional dhe personal të një studenti është në vlerën e 18 mijë lekëve pa TVSH.

Nëse operatori ekonomik, me të cilin do të lidhet kontrata e sigurimit do të paguaj palët e treta të dëmtuara deri në vlerën e 5 milionë lekëve, vetë specializantin për aksidente të ndryshme do ta paguaj deri në një milion lekë.

Numri total i studentëve specializantëve që do të përfitojnë sigurim jete dhe profesional është 775. Sigurimi i përgjegjësisë profesionale është një garanci që përdoret në të gjithë botën e që së fundmi po futet si koncept edhe në Shqipëri.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.