Sistemi bankar është forcuar – Blerjet e kanë balancuar sektorin, nxisin konkurrencën
Banka e Shqipërisë vlerëson se viti 2018 solli përmirësime të mëtejshme në veprimtarinë e sistemit bankar. Në raportin e tij para komisionit të Ekonomisë dhe Financave, Guvernatori Sejko tha se aftësia e këtij sektori për të përballuar rreziqe është e lartë. Kapitalizimi dhe likuiditeti janë në nivele më se të kënaqshme, ndërsa raporti i kredive me probleme ka zbritur në nivelet më të ulëta prej pothuajse një dekade.
Guvernatori u shpreh optimist edhe për sa i takon procesit të ristrukturimit të bankave. Ai theksoi se procesi i shitblerjeve ka qenë i balancuar, duke krijuar disa banka të përmasave të përafërta brenda sistemit. Kjo pritet të nxisë konkurrencën dhe të rrisë ofertën për kredi në ekonominë shqiptare.
Në fund të vitit të kaluar, sistemi bankar shqiptar u përqendrua në 14 banka, nga 16 që kishte një vit më parë. Këtë vit, pritet që numri i bankave të ulet në 12, si rezultat i përthithjes së Bankës Ndërkombëtare Tregtare nga Union Bank dhe mbylljes së Bankës së Kreditit të Shqipërisë, që prej vitesh kishte një aktivitet në përmasa të papërfillshme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.