Sistemi bankar – Sejko: Karakterizohet nga nivele të mira likuiditeti, kapitali dhe përfitueshmërie
“Aktualisht, sistemi bankar karakterizohet nga nivele të mira likuiditeti, kapitali dhe përfitueshmërie, të cilat mundësojnë premisa pozitive për rritjen e kreditimit në vend”. Këtë e ka bërë të ditur kreu i Bankës së Shqipërisë, Gent Sejko gjatë takimit me delegacionin e Bnkës Botërore, të kryesuar nga Maryam Salim, Përfaqësuese e Përhershme e Zyrës së Bankës Botërore në vendin tonë.
Sipas Sejkos, sistemi bankar është në një fazë të rëndësishme konsolidimi, që pritet të kontribuojë në rritjen e konkurrencës dhe zhvillimin e mëtejshëm të tij. Ndërkohë, ndërsa ëhstë ndalur te kreditë me probleme, sipas Sejkos, plani ndërinstitucional i veprimit për reduktimin e tyre ka dhënë efektet pozitive.
Në vijim, Guvernatori njohu delegacionin edhe me punën e realizuar nga Banka e Shqipërisë për hartimin e projektligjit “Për shërbimet e pagesave”, i cili synon të përafrojë një direktivë të rëndësishme evropiane në fushën e pagesave. Ky projektligj, i cili do të kalojë për miratim së shpejti, pritet të ketë një ndikim të drejtpërdrejtë në nxitjen e konkurrencës dhe inovacionit në fushën e pagesave me vlerë të vogël, duke promovuar kështu efikasitetin dhe reduktimin e kostove që mbart përdorimi i tyre.
Ndërkohë, në mbyllje të takimit, Salim përgëzoi Guvernatorin Sejko dhe Bankën e Shqipërisë për angazhimin e shprehur gjatë zbatimit të projekteve të përbashkëta, të cilat kanë rezultuar mjaft të suksesshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.