Sistemi i pagesave në Eurozonë – Borxhi i Italisë, krediti i Gjermanisë me BQE shënojnë rekord

Debiti i Italisë dhe krediti i Gjermanisë me Bankën Qendrore Europiane kanë shënuar nivele rekord muajin e kaluar, ndërkohë që paraja është kanalizuar drejt ekonomisë më të fortë të Eurozonës dhe ka dalë prej asaj që ndodhet në vështirësi.

Të dhënat theksojnë pabarazitë brenda eurozonës dhe mundësinë e falimentimeve sovrane nëse blloku do të shpërbëhej. Borxhi neto i Italisë në sistemin e pagesave të BQE, të quajtur “Target 2”,  që rregullon pagesat përtej kufijve kombëtarë në Eurozonë, u rrit në një rekord prej 386.1 miliardë euro në muajin Shkurt, periudhë kur pretendimet neto të Gjermanisë shënuan nivelin më të lartë të të gjitha kohërave prej 814.4 miliardë euro. Hendeku vjen prej tregtisë së fortë gjermane por reflekton gjithashtu preferencën e kursimtarëve për borxhin më të sigurt të Eurozonës, ndërkohë që bankat në Itali gjenden në vështirësi dhe humori anti-euro po rritet.

Ndërkohë që këto pagesa nuk rregullohen nga bankat qendrore kombëtare, sasia totale përfaqëson paranë që secila prej tyre do të duhet të paguajë apo marrë, nëse blloku i valutës së përbashkët shpërbëhet. Kërcënimi i dështimit të pagesave të borxhit përtej kufijve është parë si një element që ka mbajtur eurozonën të lidhur gjatë krizës financiare.

Pozicioni i Italisë në sistemin e pagesave Target 2, është përkeqësuar gjatë krizës së borxhit në Eurozonë, ndërkohë që investitorët e huaj kanë shitur asetet italiane.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.