Sistemi i ujitjes dhe kullimit – Peleshi: Brenda vitit do të fillojmë dy projekte të mëdha
Brenda këtij viti do të nisin dy projekte të rëndësishme në sektorin e ujitjes dhe kullimit. Lajmin e ka bërë të ditur ministri i Bujqësisë dhe Zhvillimit Rural, Niko Peleshi gjatë një vizite në qarkun e Fierit, ka bërë dhe një ndalesë në stacionin e pompimit të fshatit Sulzotaj, i cili është pjesë e skemës të sapo rehabilituar të Divjakës, investim i mbështetur nga Banka Botërore.
“Do fillojmë dy projekte të mëdha, të fuqishme, brenda këtij viti. Një projekt që ka të bëjë me rehabilitimin e dy skemave, dy degëve që furnizohen nga dega e Krutjes, rezervuari i Thanës. Njëra prej tyre furnizon zonën e Libofshës me ujë, dhe vendos nën ujë 1300 ha, ndërsa dega tjetër furnizon një zonë prej 300 mijë ha në Divjakë, ndërkohë me projektin shtesë të Bankës Botërore, që për pak kohë, brenda majit shpresoj do të ratifikohet në Parlament, një program prej 23 milionë euro, një pjesë e mirë e të cilit, përfitohet nga kjo zonë, nga qarku i Fierit dhe një pjesë në zonën e Konispolit. Nga ai projekt ne do të shtojmë dhe 12 mijë ha të tjera. Janë dy degë, dega e Çukasit dhe dega e Lushnjës, furnizohen përsëri nga rezervuari i Thanës, që do të rehabilitohen me këtë formë. Në këtë mënyrë, ne shënojmë krahas projekteve të tjera të realizuara në këto vite, me një sipërfaqe pothuajse rreth 30 mijë ha të vendosur nën ujë.”
Sipas Peleshit, falë projekteve të Bankës Botërore në kuadër të zhvillimit rural në Shqipëri janë rehabilituar rreth 24 300 ha tokë bujqësore në të gjithë vendin. Ndërkohë, pritet të shtohen gjithashtu edhe priten të shtohen edhe 16500 ha tokë në Lushnjë, Konispol, Kuçovë, Maliq dhe Has.
Sa i takon qarkut të Fierit, janë financuar më shumë se 20 projekte të ujitjes dhe kullimit, duke qenë se është edhe një ndër zonat më intensive bujqësore në Shqipëri. Ndërkohë, sipas ministrit, krahas tyre, përmbytja vijon të mbetet ende një sfidë në këtë zonë.
“Ndërkohë, sfida tjetër, veç kullimit dhe ujitjes, është dhe ajo nga përmbytja. Kur kemi probleme të mëdha, me Drejtorinë e Ujitjes dhe Kullimit kemi bërë disa ndërhyrje, brenda mundësive buxhetore që kemi, por ndërkohë kemi analizuar të gjitha pikat e nxehta, që rezultuan edhe pas dy përmbytjeve qe kemi patur në fund të vitit të kaluar dhe në fillim të vitit aktual. Këto ditë që po flasim, një grup shumë interesant dhe shumë i kualifikuar prej 10 ekspertësh nga Agjencia Kombëtare e Ujit e Turqisë, mundësuar nga qeveria turke, është duke punuar intensivisht, duke inspektuar të gjitha hotspotet tona dhe do të na japë një dorë të fortë për realizimin e këtyre projekteve.”
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.