Sistemi i vlerësimit të pronës, Ahmetaj: Suedia do të mbështesë financiarisht projektin
Ministri i Financave dhe Ekonomisë, Arben Ahmetaj, priti në një takim Drejtoren e Përgjithshme të Agjencisë Suedeze të Bashkëpunimit Ndërkombëtar, Carin Jämtin, së bashku me delegacionin që e shoqëron atë. Pas takimit, në deklaratën e përbashkët për mediat, Ahmetaj theksoi se Suedia do të mbështesë në projektin e ngritjen e sistemit të vlerësimit të pronës mbi bazën e vlerës së tregut.
Ahmetaj shtoi se SIDA mbështet vendin tonë me financime vjetore prej 9 milionë euro për reformën administrative territoriale.
Duke u ndalur te shkëmbimet tregtare, Ahmetaj tha se ka një rritje në masën 56%, krahasuar me 2016. Ndërkohë Ahmetaj u ndal te sipërmarrja suedeze duke i bërë thirrje të shfrytëzojnë potencialet e krijuara nga nismat e fundit të qeverisë shqiptare, siç është edhe derregullimi.
Ndërkohë Drejtorja e Përgjithshme të Agjencisë Suedeze të Bashkëpunimit Ndërkombëtar, Carin Jämtin,u shpreh se përveç ndihmës ekonomike, Suedia do mbështesë Shqipërinë edhe në sferën politikë për hapjen e negociatave dhe integrimin në BE.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.