Sistemi TIMS në gjendje kritike – Policia e Shtetit do të investojë 41.6 mln lekë në servera
Policia e shtetit do të investojë 41,6 milionë lekë për të zgjeruar dhe përmirësuar kapacitetet e sistemit të manaxhimit ndërkombëtar të hyrje-daljeve të shtetasve, TIMS.
Tenderi do të jetë i hapur deri më 4 shtator 2017, datë pas së cilës do të vlerësohen ofertat.
Nga kompanitë e kualifikuara, do të përzgjidhet fituese ajo e cila do të ketë bërë ofertën më të ulët dhe do të ektë 12 javë kohë për të ekzekutuar projektin, pra për të bërë instalimin dhe vënien në funksion të serverëve që do të vendosen në mjediset e Ministrisë së Punëve të Brendshme.
Kontrata që do të nënshkruhet me Policisë së Shtetit dhe kompanisë fituese do të ketë një afat 1-vjeçar, ndërsa financimi do të jetë dy-vjeçar, ku për vitin 2017 do të jetë në dispozicion një fond maksimal prej 12.5 milionë lekësh, ndërsa pjesa tjetër prej 29.16 milionë lekësh do të jepen në vitin 2018.
Ky sistem ofron një shërbim shumë të rëndësishëm dhe jetik për Policinë e Shtetit, por nga viti në vit ngarkesa është në rritje, së bashku me numrin e madh të transaksioneve që TIMS operon në njësinë e kohës. Për këtë arsye është e nevojshme rritja e kapaciteteve të makinerive ku këto sisteme operojnë.
Policia e konsideron gjendjen aktuale të infrastrukturës së serverëve si kritike për arsyet e mëposhtme:
- Pajisje në prag amortizimi për përballimin e ngarkesës gjithnjë e në rritje
- Numër i lartë transaksionesh për t’u procesuar në njësinë e kohës
- Numër i lartë përdoruesish që shfrytezojnë këto aplikacione
- Trafik i lartë veprimesh në periudha sezoni të cilat shkaktojnë ngarkesë në të gjitha pikat e kalimit kufitar (ajror, tokësor, detar)
Në të shkuarën, ngarkesat prej fluksit të madh të qytetarëve që kalojnë kufirin kanë shkaktuar bllokime të sistemit, duke krijuar radhë dhe pakënaqësi.
Përmirësimi i infrastrukturës hardware do të ndikojë direkt në ofrimin e shërbimit pa ndërprerje, në një procesim më të shpejtë të informacionit dhe raportim real pranë përdoruesve dhe strukturave përkatës, si edhe përballimin e trafikut të shtuar të hyrje daljeve në pikat e kalimit kufitar.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.