Situata me zjarret – Emergjencat Civile: 10 vatra zjarri në 24 orë

Situata me zjarret në vendin tonë vijon të mbetet  problematike, si pasojë e temperaturave të larta. Vetëm gjatë 24 orëve të fundit  janë krijuar 10 vatra zjarri në pyje në qarqet Vlorë, Shkodër, Durrës, Fier dhe Berat të cilat kanë shkaktuar dëme materiale.

Sipas Emergjencave Civile, shërbimet zjarrfikëse ndërhynë në kohë duke bërë të mundur shuarjen e flakëve. Në qarkun e Beratit, në fshatin Bogovë, Çorovodë si pasojë e flakëve u dogj një sipërfaqe rreth 1 ha me shkurre dhe pisha.

Po ashtu në fshatin Gjorgos të  Fierit  zjarri  dogji  një sipërfaqe rreth 4 ha me shkurre, ferra dhe pisha. Flakët kanë përfshirë edhe  fshatin Zhamë të Lushnjes, duke djegur  3 ha shkurre, ferra dhe disa ullinj të rinj. Emergjencat Civile bëjnë me dije përgjatë 24 orëve janë djegur edhe 1 ha me shkurre ferra dhe 4 dynym me shkurre dhe pisha në Zvërnec dhe Armen të Vlorës.

Në Shkodër, në fshatin Gruemirë u dogj një sipërfaqe prej 3 dynymësh me shkurre dhe ferra, ndërsa në Koplikun e  Sipërm, flakët dogjën rreth 1 dynym me bimë medicinale. Rastet e rënies së zjarrit u shënuan edhe në Durrës, tek Gjiri i Lalzit në afërsi të stacionit të trenit, ku si pasojë e flakëve  dogj rreth 1 dynym me shkurre dhe ferra.

Sipas drejtorisë së emergjencave civile, Për fikjen e flakëve në të gjithë operacionet janë angazhuar mbi 50 forca zjarrfikëse, 14 automjete, 20 forca të pyjores si dhe banorët e zonës.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.