Situata nga përmbytjet – Panariti: Qeveria të bëjë vlerësimet për dëmet e shkaktuara

Situata e përmbytjeve të shkaktuara ditët e fundit ka qenë edhe çështja kryesore e diskutimit në mbledhjen e Grupit Parlamentar të Lëvizjes Socialiste për Integrim. Sipas deputetit të LSI-së, Edmond Panariti, përmbytjet kanë shkaktuar dëme kolosale në banesa, prodhime bujqësore si dhe bagëti të dëmtuara.

Duke u shprehur se Shqipëria  ndodhet de facto në kushtet e një katastrofe natyrore, ai i ka bërë apel qeverisë për ndërhyrje për normalizimin e situatës.

“Ndërkohë që nuk kuptojmë pse qeveria heziton të shpall gjendjen e emergjencës kombëtare, ku ne ndodhemi de facto në kushtet e një katastrofe natyrore, e cila ka përfshirë të gjithë Shqipërinë. Pra, kërkohet ndërhyrje emergjente. LSI u bën thirrje institucioneve shtetërore, të cilët të jenë në terren, të jenë përkrah banorëve, përkrah bizneseve të dëmtuar, përkrah fermerëve të dëmtuar, dhe të mobilizojnë në radhë të parë ndihmat emergjente, të zhvendosin popullatën nga banesat e përmbytura, ti pajisin ata me materiale të domosdoshme për të garantuar në radhë të parë mbijetesën, dhe më pas të shpërndajnë ndihma ushqimore, bazë ushqimore për blegtorinë, dhe ajo që është më kryesore të çojnë në mënyrë urgjente grupet e vlerësimit, të dëmeve të shkaktuara nga kjo katastrofë natyrore”, tha Panariti.

Ndërkohë, ai vuri theksin te prodhimi bujqësor, sipas të cilit fondet ku ai është inekzistent duhet t’u kalojnë për dëmshpërblim të prekurve nga përmbytjet, duke kërkuar nga qeveria vlerësimin e dëmeve.

“Grupet e punës nga Ministria e Bujqësisë, nga Ministria e Pushtetit lokal dhe nga bashkitë duhet të ishin në terren për të bërë vlerësimet, për të filluar procesin e vlerësimit dhe më pas të dëmshpërblimit të dëmeve katastrofike të shkaktuar nga kjo fatkeqësi natyror.”

Raporti i fundit i  Bankës Botërore mbi emigrimin e shqiptarëve ka qenë gjithashtu një tjetër çështje diskutimi në mbledhjen e Grupit Parlamentar të LSI-së. Sipas Panaritit, shqetësues në këtë drejtim është largimi i kapaciteteve intelektuale e profesionale, duke shtuar se po ndikon drejtpërdrejt në burimet njerëzore të vendit.

“Kërkohet urgjentisht ndryshimi i strategjive dhe përqasjeve në mënyrë që të dalim me një ofertë të qartë që këta intelektualë, që këta studentë, të rinj dhe të reja, që kanë investuar për kualifikimin e tyre të mos e lënë vendin, por ti shërbejnë zhvillimit të ekonomisë, zhvillimit të artit dhe të kulturës me një perspektivë të qartë brenda vendit”, u shpreh Panariti.

Si zgjidhje për këtë çështje, Panariti është shprehur se LSI do të bëjë pjesë të ofertës së saj strategjinë për hapjen e vendeve të reja të punës dhe kthimin e valës migratore.

G.DSCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.