Situatë kaotike në aeroporte/ Kompanitë ajrore: Duhen 18 muaj për rikthim në normalitet

Kompanitë ajrore nëpër botë po përpiqen të rikthejnë normalitetin në aeroporte pasi prej ditësh mijëra turistë po përballen me shtyrje dhe anulime të fluturimeve, por dhe me grevat e përgjithshme të stafit. Sektori ka marrë një ndihmë prej 200 miliard dollarësh në nivel global, por sipas operatorëve do të duhen 18 muaj për një rikthim në normalitet të plotë.

Sektori në fakt numëron 2 milion më pak  të punësuar. Një shifër kjo që shpjegon dhe kaosin e krijuar në botën e transportit ajror me pasoja që po i ndjejnë udhëtarët në çdo cep të globit. Pikërisht në momentin që sezoni turistik është në kulmin e tij, mungojnë pilotë, kontrollorë ajrorë dhe personel në aeroporte. Rifillimi i fluturimeve ishte shumë më i shpejtë dhe më intensiv nga sa kishin parashikuar kompanitë ajrore.

Madje këto të fundit konfirmojnë se nuk kanë parë asnjëherë më parë një fluks të tillë udhëtarësh. Kompania gjermane e Lufthansa ka anuluar 900 fluturime për shkak të personelit të reduktuar ndërsa British Airways 10% të tyre.

Por dhe aeroporti i Londrës Gatwick dhe ai i Amsterdamit, Schipol kanë reduktuar me 10% fluturimet për muajin korrik dhe gusht. Ditët e fundit ka pasur anulime të konsiderueshme dhe në aeroportin e Parisit “Charles De Gaulle” dhe atë të Londrës “Heathrow”.

Një goditje më shumë e japin dhe grevat si ajo e nëpunësve të Ryanair të cilët kërkojnë rritje page dhe kushte më të mira pune. Personeli u Ryanair në Belgjikë paralajmëroi tre ditë greve në datat 24,25 dhe 26 qershor.

Sipas sindikatave kompania vijon të mos respektojë të drejtat e punëtorëve belgë si dhe garancinë e një page minimale për të gjithë. Greva të ngjashme janë paralajmëruar dhe në Spanjë, Portugali dhe Itali. Sindikata spanjolle “Uso” paralajmëroi një grevë nëntë ditore në muajin korrik nga ana e personelit të kompanisë ajrore “Easy Jet”. Greva që përfshin 450 nëpunës ka të bëjë me mungesën e një marrëveshjeje për një kontratë kolektive.

Një grevë tjetër është në program në 2 korrik në Paris, ndërkohë që një ditë më parë aeroporti i Brukselit u detyrua të mbyllet për shkak të mungesës së personelit.

Në aeroportin e Nju Jork, La Guardia, është anuluar një fluturim në tre, si pasojë e mungesës së pilotëve.

Pasojat për këto situata bien mbi udhëtarët që janë të detyruar të përballen me më pak fluturime dhe çmime të larta dhe për shkak të rritjes së çmimit  të karburanteve. Sipas disa vlerësimeve një fluturim në Europë kushton mesatarisht dyfish më shumë në krahasim me një vit më parë. Ndërsa për fluturimet kombëtare rritja e çmimit ka mbetur në nivelin e 20% më shumë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.