S’ka më krizë për KESH – Në 2 muaj siguron mbi 8.8 mln euro nga shitja e energjisë
Mbi 8.8 milion euro është fitimi i Korporatës Elektroenergjetike Shqiptare nga shitja e energjisë nga data 29 nëntor deri në 12 janar. Por kjo shumë pritet të jetë shumë herë më e lartë për gjithë muajin janar, duke qenë se KESH ka hapur edhe një procedurë tjetër shitje për periudhën 26 janar deri 1 shkurt, ku planifikon të shesë një sasi prej 9100 kwh.
Reshjet e shiut, shtuan prurjet në Kaskadën e Drinit, ndërkohë që deri më tani janë përfunduar 9 procedura të shitjes së energjisë, duke u reflektuar në rritjen e të ardhurave të kompanisë.Fitimi më i madh u sigurua në shitjen për periudhën 22 janar deri 4 shkurt, çka i siguroi kompanisë mbi 2.8 milion euro të ardhura.
Pas një periudhe të gjatë thatësire, ky është një lajm i mirë për korporatën, duke qenë se bilanci 9 mujor i kompanisë doli me humbje. Sipas të dhënave zyrtare nga KESH, për periudhën janar-shtator kompania regjistroi humbje prej 4.2 miliard lekë, ndryshe nga viti i kaluar ku u regjistrua një bilanc pozitiv prej 1.7 miliardë lekësh.
Ndërkohë që, shifrat për bilancin e kompanisë për vitin 2017 ende nuk janë bërë publike, por për shkak të situatës së vështirë si pasojë e kushteve të motit, pritshmëritë nuk janë shumë pozitive. Kjo për faktin se kompania shpenzoi milion euro për importin e energjisë, duke konsumuar edhe kredinë e Bankës Botërore, për rimëkëmbjen e sektorit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.