Skanohen dosjet e të gjithë gjykatave – Arkivi, që në vitin 1945, por vetëm fizik dhe i çrregullt

Këshilli i Lartë Gjyqësor ka shpallur një tender me vlerë 96 milionë lekë për digjitalizimin e arkivave të gjykatave në Shqipëri. Volumi dhe puna e kërkuar nuk mund të mbulohet nga vetë institucioni, veçanërisht kur përfundimi i tyre kërkohet brenda një kohe relativisht të shkurtër ndërsa asnjë regjistër apo dosje nuk është digjitalizuar ende.

“Aktet e arkivuara rezultojnë të jenë të natyrave dhe llojeve të ndryshme. Ato përbëhen nga dosje gjyqësore të qepura në forma të ndryshme në varësi të gjykatave.  Pjesë e dokumentacionit arkivor janë aktet administrative të prodhuara nga gjykata për efekt të veprimtarisë së saj jo gjyqësore si për shembull akte të titullarit, akte mbi veprimtarinë financiare dhe të burimeve njerëzore etj.” shkruhet në dokumentet e tenderit.  Sa i përket vjetërsisë së dokumenteve evidentohet se ruhen akte që prej vitit 1945 pasi në asnjë nga gjykatat nuk është zhvilluar procesi i rregullimit të arkivës dhe asgjësimit të akteve të cilat kanë kaluar afatin e ruajtjes.

I gjithë fondi arkivor është i pa digjitalizuar dhe gjendet në formë shkresore në ambientet e gjykatës. Arkivat e gjykatave nuk janë në ambiente të qendërzuara në çdo gjykatë, por janë të shpërndara në ambiente të ndryshme duke filluar nga arkivi, kryesekretaria dhe zyra e kryetarit të gjykatës.

Për shkak të mos qendërzimit të arkivës, dhe mungesës së hapësirave ndërtimore gjykatat nuk kanë një arkivë të mirëfilltë dhe standarde infrastrukturore për ruajtjen e materialeve shhkresore. Në arkivat e gjykatave evidentohet mungesa e sistemit të sigurisë së ambienteve dhe për pasojë mungesa e sigurisë së ruajtjes së arkivës nga raste fajtore apo me dashje pasi në ambientet ku ruhen dosjet nuk janë të instaluar sisteme kundër zjarri, alarmet kundër zjarrit, mjetet për shuarjen e zjarreve të mundshme etj.).

Objektivi i përgjithshëm i projektit nga i cili kjo kontratë do të jetë skanimi i fondit arkivor te gjykatave të Republikës së Shqipërisë. Skanimet e kryera do të ruhen në format digjital në pajisje të përshtatshme për ruajtjen, kërkimin dhe përdorimin e tyre në të ardhmen.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.