Skema e pazakontë për të shkundur ekonominë- Pakistani do të eksportojë gomerë në Kinë! Nisin investimet në ferma

Në mënyrë që t’i japë një shtytje sektorit të eksporteve, Pakistani do të eksportojë gomerë në Kinë, duke krijuar kështu mundësinë që të fitojë miliona nga tregtia, raporton “Gulf Neës”.

Një zyrtar i lartë i departamentit të tregtisë e ka konfirmuar këtë lëvizje.  Në rang global, Pakistani mban vendin e tretë në botë përsa i përket numrit të këtyre kafshëve. Ky zyrtar ka deklaruar se departamenti i tregtisë po fokusohet në ndërtimin e fermave të gomerëve në mënyrë që të rriten eksportet. Së fundmi është inauguruar edhe një godinë e posaçme veterinare në Lahore që do të mbështesë këtë iniciativë. Dy ferma të tjera janë duke u ndërtuar në Dera Ismail Khan dhe Mansehra me investim të huaj.

Me këtë rast, kompanitë e huaja janë të gatshme që të bëjnë 3 miliardë dollarë investime për të ngritur fermat e gomerëve për qëllime tregtare.  Gjatë tre viteve të para, qeveria ka parashikuar që të eksportohen në Kinë 80 mijë gomerë.

Mbarështimi i gomerëve konsiderohet një aktivitet fitimprurës për faktin se xhelatina prodhohet nga lëkura e tyre dhe konsiderohet se ka efekte mjekësore.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.