Skema/Zhdoganonin makinat me vlerë të ulët – Policia e Durrësit arreston 3 persona
Sillnin mjete nga jashtë shtetit, iu falsifikonin dokumentet dhe ulnin vitet e prodhimit. Policia e Durrësit ka zbuluar skemën se si doganierë dhe agjent doganor zhdoganonin mjetet me vlerë më të ulët monetare se vlera normale.
Policia e Durrësit, në kuadër të operacionit “Silent”, ka arrestuar 3 persona për falsifikim dokumentesh, ndërsa një i katërt është shpallur në kërkim.
“Në pranga janë vënë 29-vjeçari E.Ç, 32-vjeçari Q.K dhe 35-vjeçari G.S, shpallur në kërkim shtetasi Xh.S.
Shtetasit e mësipërm, në bashkëpunim me njëri – tjetrin kanë sjellë mjete nga jashtë shtetit në vendin tonë dhe duke falsifikuar dokumente kanë ulur vitin e prodhimit dhe i kanë zhdoganuar. Në këtë mënyrë vlera e zhdoganimit të mjeteve ka qenë më e ulët në vlera monetare se vlera normale bazuar në vitin e saktë të prodhimit të tyre”.
Gjithashtu, janë ekzekutuar vendimet e Gjykatës së Rrethit Gjyqësor Durrës, të cilët kanë vendosur masat e sigurisë si më poshtë në ngarkim të shtetasve:
- Kostandin Risto 59 vjeç, banues në Durrës, me detyrë agjent doganor është vendosur masa e sigurisë “Arrest shtëpie”;
- Mirjan Driza 44 vjeç, banues në Durrës, me detyrë agjent doganor është vendosur masa e sigurisë ”Detyrim paraqitje pranë oficerit të Policisë Gjyqësore”.
- Neritan Bablusha 49 vjeç, banues në Tiranë, me detyrë doganier është vendosur masa e sigurisë “Pezullimi i ushtrimit të një detyrë a shërbimi publik” ;
- Endrit Pllumbi 39 vjeç, banues në Tiranë, me detyrë doganier është vendosur masa e sigurisë “Pezullimi i ushtrimit të një detyrë a shërbimi publik” ;
- Sokol Mehmeti 51 vjeç, banues në Durrës, me detyrë doganier është vendosur masa e sigurisë “Pezullimi i ushtrimit të një detyrë a shërbimi publik”.
Në ngarkim të një shoqërie tregtare, e cila funksiononte si agjenci doganore është vendosur masa e sigurisë me karakter ndalues ”Ndalimi i përkohshëm i ushtrimit të veprimtarive të caktuara profesionale ose afariste”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.