Skenarët rezervë të borxhit – Financat përgatisin 3 strategji alternative për huamarrjen 

Ministria e Financave dhe Ekonomisë krahas strategjisë së menaxhimit të borxhit publik, kanë dhe “skenarët alternativë” , rezervë  me objektiv uljen e ekspozimit ndaj rreziqeve, siç janë  ndaj rrezikut  të rifinancimit dhe atij të normave të interesit. Për këtë  specialistët e këtij dikasteri kanë hartuar dhe 3  strategji alternative.

Strategjia e 1

Përfshin  që rreth 90 %  e totalit të financimit bruto do të bazohet ne financimin e brendshëm, duke ruajtur raportet aktuale të financimit ndërmjet titujve afatshkurtër dhe afatgjatë( rreth 70 % me 30 %).  Sipas saj, financimi i huaj do të bazohet  në projektet ekzistuese, financimin e projekteve te reja te konsideruara si prioritare  nga qeveria dhe mbështetjen buxhetore te akorduar nga institucionet  ndërkombëtare financiare  ne përputhje me kuadrin makro-fiskal.

Strategjia e 2

Rreth 80-85 % e totalit të financimit bruto  do të bazohet në financimin e brendshëm  duke krijuar  hapësira  për të rritur  financimin ne favor  të titujve afatgjatë. Financimi i huaj  do të bazohet në  financimin e projekteve ekzistuese si dhe me një shtese fondi  financimi  të huaj 80-100 milion euro në vit  të siguruar  nëpërmjet  nje instrumenti  të disbursueshëm  në harkun kohor  të 3 viteve, ose çdo lloj instrumenti tjetër ne varësi të kushteve të tregut. Kjo strategji alternative ka  disa avantazhe si  përmirëson ekspozimin ndaj rrezikut te rifinancimit, ul huamarrjen e brendshme, ul  presionin e huamarrjes se brendshme duke lëne hapësirë për tregun prima te qeverise, si dhe lehtëson sigurimin e valutës për të kryer ripagesat e borxhit të huaj.

Strategjia 3

Në vitin 2018 parashikon që 75 % e totalit të financimit   bazohet në  financimin e brendshëm duke  krijuar hapësira për të rritur financimin  në favor të titujve afatgjatë. Financim i huaj i bazuar në projekte ekzistuese  dhe të reja, si dhe me një shtesë  financimi të huaj 400-500 milion euro në vitin 2018  të siguruar nëpërmjet  emetimit të një eurobondi. Kjo alternative ka si avantazhe përmirësimin e ekspozimit  ndaj  rrezikut të rifinancimit të normave të interesit, siguron valutë të mjaftueshme për të  kryer ripagesat  e borxhit të huaj  në vitin 2018, ul presionin për tregun e brendshëm dhe le hapësira për kreditim të  sektorit privat, si dhe garanton  një prezencë për të madhe të vendit tonë në tregjet ndërkombëtare.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.