Sllovakët ngecen në Rinas – Kompania falimenton, Sllovakia dërgon 3 avionë qeveritarë për të marrë turistët
Pikërisht në momentin që sezoni turistik po hyn në kapacitet të plotë, një episod aspak i këndshëm ka ndodhur. Plot 84 turistë sllovakë kanë ngecur në Shqipëri për shkak se, agjencia e tyre turistike, “Albania Travel”, ka falimentuar.
Falimentin e bën me dije vetë agjencia në faqen e saj online, dhe mban datën 24 korrik. Kompania në fjalë është sllovake.
Ministria e Brendshme sllovake i është përgjigjur interesit të Scan në lidhje me këtë çështje dhe sqaron se, ka dërguar plot 3 avionë shtetërorë në Aeroportin Nënë Tereza për të marrë turistët e bllokuar në territorin e vendit tonë.
“Ministrisë i është kërkuar ndihmë nga një kompani sigurimi”-deklaron Ministria e Brendshme e Sllovakisë. Duke qenë se është kulmi i sezonit turistik, kompania e ka pasur të pamundur që të marrë me qira avionë privatë, ç`ka e ka detyruar t`i drejtohet shtetit sllovak.
Qeveria sllovake nga ana tjetër i ka bërë apel qytetarëve të saj që të kenë kujdes ndaj agjencive të udhëtimit që ofrojnë vetëm një lloj udhëtimi, siç ishte edhe rasti i “Albania Travel”.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.