SME-të dominojnë ekonominë/ Pesha e tyre në prodhim dhe në punësim, më e lartë se në BE

Ndërmarrjet e vogla dhe të mesme përbëjnë shtyllën kryesore për shumicën e ekonomive, por në Shqipëri pesha e tyre është edhe më e lartë krahasuar me ekonomitë e zhvilluara. Sipas të dhënave nga Instituti i Statistikave, për vitin 2018, ndërmarrjet e vogla dhe të mesme kontribuonin me pothuajse 80% të punësimit të përgjithshëm në ekonomi.

Në vendet e Bashkimit Europian pesha e këtyre ndërmarrjeve në punësim është më e vogël, me rreth 67% të totalit. Një diferencë e ndjeshme ekziston edhe në strukturën e prodhimit. Në Bashkimin Europian, SME-të gjenerojnë rreth 56% të prodhimit të përgjithshëm, në Shqipëri ato sjellin afro 69% të vlerës së shtuar. Këto diferenca vënë në dukje një peshë relative më të ulët të biznesit të madh në ekonomi.

Sipas kriterit të numrit të të punësuarve, Shqipëria ka vetëm 181 biznese të mëdha, me më shumë se 250 punonjës. Bizneset mikro, të vogla dhe të mesme ndërkohë janë mbi 107 mijë, ose 99.8% e totalit. Pesha më e ulët e biznesit të madh në ekonomi mund të jetë nga treguesit e konkurrueshmërisë relativisht të dobët të ekonomisë shqiptare. Në teori, biznesi i madh është më konkurrues, sepse për shkak të përmasave mund të përfitojë nga ekonomitë e shkallës, duke ulur kostot e prodhimit për njësi.

Përmasat më të mëdha iu japin këtyre bizneseve më shumë mundësi për të investuar në teknologji, zhvillim dhe zgjerim. Kostot më të ulëta dhe investimet më të mëdha në automatizimin e proceseve të prodhimit rrisin produktivitetin e punës, që mat xhiron mesatare për çdo të punësuar. Sipas Instat, për ndërmarrjet e mëdha produktiviteti i punës është 4.7 milionë lekë në vit, ndërsa për ndërmarrjet e vogla dhe të mesme, rreth 4.1 milion lekë në vit.

Ersuin Shehu/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.