SME-të në Shqipëri gjatë vitit 2019. 99.8% e ndërmarrjeve aktive janë të vogla dhe të mesme
Të dhënat më të fundit të Institutit të Statistikave mbi ndërmarrjet e vogla dhe të mesme, referuar vitit 2019, tregojnë se këto ndërmarrje në vendin tonë zenë të njëjtën përqindje të ndërmarrjeve aktive si në vitin 2018, pra 99.8%
Pavarësisht numrit të pandryshuar të ndërmarrjeve, numri I të punësuarve është rritur nga 79.8% që ishte gjatë vitit 2018 në 81.6% gjatë vitit 2019. Po ashtu të dhënat tregojnë se edhe numri i shitjeve neto të realizuara nga ndërmarrje te vogla dhe të mesme është rritur me 1.5 %, nga 77.4% në vitin 2018, në 78.9% gjatë 2019-ës.
Nga ana tjetër shohim se numri i investimeve në vend nga ndërmarrjet e vogla dhe të mesme ka rënë me 2.4%. Në vitin 2018 investimet nga këto ndërmarrje në vend zinin 70.6%, ndërsa gjatë vitit 2019 investimet regjistrohen 68.2%.
Në numrin e ndërmarrjeve, sektori i tregtisë ka peshën më të madhe të ndërmarrjeve të vogla dhe të mesme me 40,1 %, ndërsa përqindja më e ulët llogaritet në sektorin e energjisë elektrike, ujit dhe menaxhimit të mbetjeve me 0,6 %.Sa i përket numrit të të punësuarve, sektori i tregtisë punëson 28,5 % të NVM-ve, ndërsa sektori me numrin më të vogël të të punësuarve në NVM-të është sektori i industrisë nxjerrëse me 1,8 %. Përsëri sektori i tregtisë mbizotëron edhe mbi vlerën e shitjeve neto, ndërsa sektori me vlerën më të ulët është është sektori i industrisë nxjerrëse.
Krahasuar me Bashkimin Europian këto tregues paraqiten pozitivë. Përqindja e ndërmarrjeve të vogla dhe të mesme është 99,8 %, pra i njëjtë me atë të bashkimit Europian. Përqindja e të punësuarve në këtë grup ndërmarrjesh është 81,6 % në Shqipëri nga 66,7% në BE dhe vlera e shtuar e realizuar nga këto ndërmarrje në Shqipëri përbën 72,4% nga 56,5% në Bashkimin Europian.
Xhorxhina Deda / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.