Societe Generale shet degët në Shqipëri dhe Bullgari tek hungarezja OTP

Banka franceze që operon edhe në vendin tonë, Societe Generale, ka deklaruar se ka arritur një marrëveshje për shitjen e degëve të saj në Bullgari dhe Shqipëri bankës hungareze OTP Bank.

Në Shqipëri, hungarezet do të marrin 88.89% të aksioneve të Bankës Societe Generale Albania, ndërsa në Bullgari njësia bullgare e OTP, DSK Bank do të kontrollojë 99.74% të Societe Generale Expressbank AD.

Banka, raporton Reuters, nuk bëri të ditur shumën e transaksionit të akordit, por u shpreh se shitjet bashkë me heqjen e njësisë private bankare në Belgjikë, do të gjeneronin një fitim për kompaninë franceze.

Diskutimet mes dy bankave po zhvilloheshin prej muajsh, siç ishte raportuar muaj më parë edhe nga “SCAN Magazine”, madje përfaqësuesit e bankës hungareze kanë qenë gjatë muajit maj në Shqipëri për t’u njohur me stafin e bankës dhe rrjetin e degëve.

Shitja është pjesë e strategjisë së grupit për të riorganizuar asetet e tij. Francezët janë shprehur se kanë ndërmend të rishohin gjurmët e tyre, duke u larguar nga vendet apo bizneset ku nuk kanë pozita të forta dominuese.

Në Shqipëri, banka franceze renditet si huadhënësi i katërt më i madh dhe në fund të tremujorit të parë të vitit kishte një portofol kredie prej afro 50 miliardë lekësh.

Me blerjen e “Societe Generale”, “OTP” bëhet grupi i parë bankar nga Bashkimi Europian që hyn në tregun bankar shqiptar për më shumë se një dekadë

SCAN

Një banke e re hyn në Shqipëri!

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.