Sondazhi, 3 në 4 të rritur duan të vaksinohen, WEF: Mund të mos mjaftojë për të mposhtur koronavirusin
Thuajse 74% e të rriturve në të gjithë botën janë të gatshëm për të marrë imunitet ndaj koronavirusit, nëse vaksina bëhet e disponueshme, por kjo mund të mos jetë e mjaftueshme për të mposhtur virusin. Ky rezultat vjen nga një sondazh i Forumit Ekonomik Botëror dhe firmës hulumtuese Ipsos ndaj 20,000 të rritur në 27 vende në periudhën 24 Korrik deri më 7 Gusht. Shumica e të anketuarve shprehën gatishmërinë për të marrë vaksinën.
Kina ishte vendi më entuziast, me 97% e të anketuarve që treguan se dëshirojnë të marrin vaksinën, ndërsa Rusia ishte e fundit, me vetëm 54% të interesuar. Megjithatë, sipas Forumit Ekonomik Botëror është shqetësuese që thuajse ¼ e njerëzve në të gjithë botën nuk synojnë të vaksinohen. Sipas ekspertëve të forumit, hendeku prej 26% i besimit tek vaksina, është i mjaftueshëm për të cënuar efektshmërinë e nxjerrjes në treg të një injeksioni kundër Covid-19.
Ndër arsyet e përmendura së fundmi për mos-vaksinimin është shqetësimi mbi efektet anësore, sipas sondazhit. Faktorë të tjerë të përmendur nga të anketuarit përfshijnë perceptimin se vaksina mund të mos jetë efektive dhe se ata nuk ndodhen në rrezik të mjaftueshëm nga virusi. Në Shtetet e Bashkuara, vendi me numrin më të lartë të të infektuarve dhe vdekjeve, 67% e të anketuarve thanë se do të bëjnë vaksinën. Ndërkohë, më pak se gjysma, apo 41%, e të anektuarve, presin që vaksina të jetë e disponueshme ndaj publikut këtë vit.
Masat për të përmbajtur virusin, si mbyllja e kufijëve dhe kufizimi i lëvizjes së njerëzve, kanë shkaktuar një rënie të aktivitetit ekonomik botëror. Shumë qeveri dhe njerëz i kanë vendosur tashmë shpresat tek vaksina për të rikthyer normalitetin në botë, pavarësisht se Organizata Botërore e Shëndetësisë ka paralajmëruar se vetëm vaksina nuk mund ta mposhtë pandeminë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.