Sondazhi i BQE drejt 149 bankave – Pritet rritja e kërkesës për kredi dhe lehtësimi i standardeve në T2
Huadhënësit në Eurozonë presin që kërkesa për kredi të korporatave, konsumatore dhe hipotekare të rritet në tremujorin e dytë dhe standardet e kreditit të lehtësohen gjithashtu, sipas sondazhit tremujor të Bankës Qendrore Europiane. Duke blerë triliona euro obligacione qeveritare dhe të korporatave në 3 vitet e fundit, institucioni në Frankfurt ka mbajtur kostot e huamarrjes në nivele rekord të ulëta, me qëllim që stimulimi i huasë dhe shpenzimeve t’i japë nxitje inflacionit.
Edhe pse skema e blerjes së aktiveve ka dhënë efekt në mënyrë më të ngadaltë se ç’pritej, huadhënia drejt kompanive dhe ekonomive familjare ka arritur nivelin më të lartë që prej krizës financiare dhe ekonomia e Eurozonës është zgjeruar për 20 tremujorë radhazi. Kjo ka rritur pritshmëritë që Banka Qendrore Europiane të përfundojë stimujt monetarë. Në tremujorin e parë 2018, bankat patën rritje të kërkesës në të gjithë kategoritë e kredisë. Sipas BQE, standardet e kreditit, apo kriteret e miratimit të kredisë, janë lehtësuar si për korporatat edhe për individët.
“Te kreditë për korporatat, presionet e konkurrencës dhe perceptimi i rrezikut ishin faktorët kryesorë që sollën impakt lehtësues në standardet e kreditit gjatë tremujorit të parë 2018”, bëri të ditur institucioni, duke shtuar se toleranca e bankave ndaj riskut ka kontribuar gjithashtu. Në tremujorin e dytë, kërkesa për kredi pritet të rritet më tej dhe standardet e kreditit të lehtësohen gjithashtu, sipas sondazhit drejt 149 bankave në zonën e valutës së përbashkët.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.