“S&P” për Britaninë – “Komentet e Bankës së Anglisë synojnë rritjen e paundit”
Agjencia e vlerësimit të kreditit Standard & Poor’s tregoi skepticizëm ndaj nevojës së Britanisë për të rritur normën bazë të interesit së shpejti dhe shtoi se komentet e Bankës së Anglisë mund të kenë patur synim rritjen e paundit.
“Mendojmë që Banka e Anglisë dhe komentet e fundit të guvernatorit Mark Carney, synojnë nxitjen e sterlinës, për të reduktuar presionet e inflacionit”, deklarojnë analistët e Standard & Poor’s.
Sipas agjencisë, strategjia mund të përfshijë një rritje me 25 pikë bazë në Nëntor, duke e çuar në nivelin ku ishte përpara referendumit në 0.5%, megjithatë nuk priten lëvizje të mëtejshme në 2018-ën.
Banka e Anglisë surprizoi investitorët muajin e kaluar kur shumica e politikëbërësve thanë se ka gjasa që kostot e huamarrjes do të rriten në muajt që vijnë, për shkak të presioneve nga inflacioni që e ka kaluar objektivin e institucionit prej 2%.
Standard & Poors nënvizoi se të ardhurat, të përshtatura me inflacionin, po tregojnë rënie dhe se pritet një tjetër ngadalësim i ekonomisë për tremujorin e tretë. Standard & Poor’s i hoqi “kurorën” prej AAA Britanisë, që është vlerësimi më i lartë i mundshëm i kreditit, duke e ulur me 2 gradë në AA, me perspektivë negative.
Standard & Poor’s deklaroi gjithashtu se pret një ngadalësim në investime nga kompanitë, për rrjedhojë të pasigurive në lidhje me Brexit.
“Përshtatjet me planet afat-gjatë të bizneseve në Britani, përfshirë investimet kapitale dhe ato të huaja direkte, pritet të japin një ndikim negativ për ekonominë”, deklaroi agjencia.
Standard & Poor’s mirëpriti komentet e Kryeministres Theresa May se Britania kërkon një periudhë 2-vjeçare të tranzicionit përpara se të dalë nga Bashkimi Europian, megjithatë deklaroi se vonesa nënkupton një periudhë më të gjatë të pasigurive për të dyja palët, mbi arritjen e një marrëdhënieje të ardhshme.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.