Spanja “bojkoton” Sofjen – Nuk pranon të firmosë deklaratën e samitit, irritohet nga prania e Kosovës
Samiti i Sofjes, që do të mbahet na datën 17 Maj, do të jetë i pari mes Bashkimit Europian dhe Ballkanit Perëndimor që prej 2003-shit në Lisbonë. Për rajonin ky samit është i një rëndësie të veçantë pasi vjen në një kohë që çelja e negociatave për anëtarësim me Shqipërinë dhe Maqedoninë si dhe avancimi i vendeve të tjera në procesin e anëtarësimit është më afër se kurrë. Më 28 Qershor do të votohet edhe çelja ose jo e negociatave.
Por ndërkohë që palët bëhen gati për samitin e Sofies, lajme aspak të mira vijnë nga Spanja. Edhe më parë kishte pasur zëra se Spanja, një prej vendeve anëtare të unionit do ta braktiste samitin, por tanimë këto zëra po bëhen edhe më të shpeshtë dhe më këmbëngulëse.
El pais, e përditshmja më e madhe spanjolle, shkruan se, kryeministri spanjoll, Mariano Rajoy refuzon të firmosë deklaratën e përbashkët të samitit, duke qenë se ajo do të firmoset edhe nga Presidenti i Kosvës, Hashim Thaci. Siç dihet, Spanja nuk e njeh Kosovën si shtet e aq më pak udhëheqësit e shtetit të ri. Kështu, Spanja ka vendosur veton, duke deklaruar se nuk do ta firmosë deklaratën që pritej të dilte nga samiti i Sofjes.
Bashkimi Europian ndërkohë ka dalë me një zgjidhje alternative, duke propozuar publikimin e dy deklaratave për të shmangur kështu problemin e firmosjes në të njëjtën letër të Spanjës me Kosovën. Paçka se janë 4 shtete që nuk e njohin Kosovën si shtet, vetëm Spanja ka dalë publikisht duke thënë se do ta bojkotojë samitin dhe deklaratën e përbashkët.
Greqia, Qipro, Rumania, Sllovakia, por edhe vetë Serbia duket se nuk kanë pasur asnjë problem me hedhjen e firmës. El Pais bën me dije se, me shumë gjasa, Mariano Rajoy do të largohet nga samiti i 17 Majit përpara takimit me liderët e 6 vendeve të Ballkanit Perëndimor.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.