Spanja do të heqë detyrimin e maskave – Ndjek vendet e tjera në Europë që po zbusin masat e pandemisë
Autoritetet në spanjë lajmëruan se vendi do të heqë detyrimin e vendosjes së maskave në ambiente të jashtme. Masa, e miratuar një javë më parë në një takim të kabinetit, do të bëhet efektive nga dita e Enjte, sipas zëdhënëses së qeverisë, Isabel Rodrigues.
Vendosja e detyrueshme e maskave në Spanjë u ricaktua në fund të Dhjetorit, për të frenuar përhapjen e variantit Omicron të koronavirusit. Në 2 javët e fundit, norma e transmetimit e Covid-19 ka rënë në mënyrë të qëndrueshme, duke arritur në 1,996 raste për 100,000 banorë ditën e Hënë, në rënie nga 3,400 që ishte në fillim të Janarit. Banorët e Madridit e mirëpritën masën. “Jemi lodhur nga vendosja e maskave, me zi presim që ti heqim”- një kalimtare për Reuters.
Spanja ka ndjekur disa vende të tjera europiane që kanë nisur të heqin disa kufizime të lidhura me Covid-19. Maskat në ambiente të jashtme nuk janë më të detyrueshme në Francë dhe Italia lajmëroi ditën e Mërkurë se do të publikojë një afat kohor për të hequr kufizimet. Pavarësisht rritjes së rasteve nga Nëntori në Janar, kryesisht prej variantit Omicron, shtrimet në spital dhe vdekjet qëndrojnë shumë poshtë valëve të mëparshme të pandemisë. Kjo vjen prej normës së lartë të vaksinimit në Spanjë dhe sëmundjes më pak të ashpër të shkaktuar nga Omicron. Spanja ka një total prej 10.3 mln rastesh që kur nisi pandemia, dhe 94,570 vdekje të lidhura me koronavirusin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.